27/10/2026
Al n’é nia „ma“ n logo!
N valgünes conscidraziuns en c**t dl logo nü KRONPLATZ y dl manajemënt dles destinaziuns ladines.
Le toponim ladin Plan de Corones á na cualité storica nia da püch. Al vëgn bele dant te documënc dl 1780, y ciafa süa forma todëscia „Kronplatz“, documentada dal 1831 inant. Plü tert s’imaginëia l’autur Karl Felix Wolff finamai l’incoronaziun de Dolasilla sön chësc col.
N.B.: finamai Wolff alzâ fora le toponim ladin.
Sce n logo dess por definiziun ester n elemënt grafich, che simbolisëia n martl y dëida da le reconësce danter d’atri, baiunse tanco de na sintesa de carateristiches y de valurs rapresentá da chësc martl. Valurs che dess ince rapresenté la jënt che vir te chël post. De chësc vers scechera bëgn dassënn cun le logo nü.
La dezijiun da tó demez la scrita „Plan de Corones“ pé na bagatela, mo é na borta berta: Te n colp falel nosc lingaz, n aspet sintí da na gran pert dla popolaziun de Mareo, y nia ma inló. Por nia baié dl inom „San Vigilio - San Martin“, che vëgn bele adoré plü dî por le raiun de Mareo y San Martin, n moscedoz gnanca da dí.
Al n’é danz no „ma“ n logo, deache l‘orenté da mantigní n lingaz de mendranza se manifestëia ince ti detais pratics, avisa ince te n logo. Chësta mancianza de sensibilité por le lingaz é n dann al laur de sconanza por le mantigní. Sce an tolerëia chësc incö, ne risćiunse nia da normalisé le menefreghism tl dagní?
Tla psicologia esistel le conzet dla „lege dl‘esposiziun“, che descrí sciöche la porsona s’aüsa a de vigni sort de cosses, ince a n martl, sce chësc ti vëgn mostré gonot assá. Ne fossel nia damí da ghiré n sforz inplü da chi che vëgn da nos en vacanza, co é dessigü bugn da intëne y finamai aprijé i inoms ladins, impede co i lascé demez por na finta comodité?
