03/01/2026
Të dashur miq, familjarë dhe të pranishëm,
Sot jemi mbledhur këtu me një dhimbje të thellë në zemër, për të nderuar dhe për t’u përshëndetur me familjarin, shokun, vëllain tonë të dashur, veprimtarin e shquar Ing. AHMET GASHI.
Nuk e kam aspak të lehte të gjej fjalët përshëndetëse për shokun i cili nuk ishte vetëm një shok – ai ishte pjesë e familjes sonë, një vëlla që zgjodhëm dhe që na zgjoi tek vetja më të mirën tonë.
Fjalët janë të pamjaftueshme për të përshkruar boshllëkun që ai lë pas, por sërish ndihem i detyruar të ndaj me ju disa mendime, disa kujtime, disa ndjenja. Ahmet Gashi ishte një njeri i jashtëzakonshëm. Ai kishte atë aftësi të rrallë të bënte të gjithë rreth vetes të ndihen të rëndësishëm, të vlerësuar dhe të dëgjuar. Me një buzëqeshje të ngrohtë dhe një fjalë të mirë në kohën e duhur, ai e bënte çdo sfide me të lehte dhe ne mes të pamundësisë gjente shpresën.
Shok, vëlla nuk do të harrojmë kurrë momentet sfiduese në organizimin e kundërshtimit të ndërtimit te fabrikës së çimentos, ishe ti promotori i pathyeshëm i organizimit që e mbajti gjalle shpresën deri në triumfim.
Do na mungojnë ato biseda të thella dhe mënyrën se si ti i jepje kuptim çdo gjëje të thjeshtë në jetë. Ti na mësove se miqësia nuk matet me kohën, por me thellësinë e kujdesit dhe sinqeritetit.
Sot, ndërsa përballojmë humbjen tënde, ndjejmë një boshllëk të papërshkrueshëm. Por, më shumë se dhimbje, ne ndjejmë mirënjohje e krenari. Mirënjohje që pata fatin të njoh dikë si ti, dikë që preku jetët tona në mënyrë kaq të thellë.
Ndërsa po të përshëndesim sot, shoku ynë, ne premtojmë të mbajmë gjallë kujtimin tënd, të jetojmë duke reflektuar vlerat që ti na mësove: bujari, mirësjellje, buzëqeshje edhe në ditët më të vështira.
Ngushëllime prindërve, gruas, vajzës, miqve dhe të gjithë atyre që të njohën. Zoti të mëshiroftë, shoku ynë i dashur.
Të dojmë, të nderojmë dhe të kujtojmë gjithmonë. Do të jetosh në kujtimet tona deri në takimin e radhës në boten tjetër.....
