ANU Engineering Event

ANU Engineering Event صفحة مخصصة للاعلان عن جميع الفعاليات والمبادرات التي ستقام في كلية الهندسة - النيلين

📢 رجعنا يا هندسة أقوى من قبل 🤍💪عارفين إننا وقفنا شغل الإعمار فترة بسيطة بسبب ضغط الإمتحانات 🎓لكن الحمد لله رجعنــا ، وبط...
20/10/2025

📢 رجعنا يا هندسة أقوى من قبل 🤍💪

عارفين إننا وقفنا شغل الإعمار فترة بسيطة بسبب ضغط الإمتحانات 🎓
لكن الحمد لله رجعنــا ، وبطاقة جديدة 🔥 وهمّة أقوى من قبل 🙌

💰 جمعنا لحدي الآن في يوم واحد 150 ألف ، وفضل حوالي مليون بس نكمّل بيها بناء الجدار 🧱

الهمة يا هندسة 💪
كل قرش ، كل مجهود ، كل لمّة بتفرق 💚
خلونا نثبت إنو الهندسة فعلاً بيتنا ، وبإيدينا حنخليها أحسن من أول ❤️




26/08/2025

🚀 البداية الفعلية لإعمار كلية الهندسة – جامعة النيلين 🚀

أمس جزء من طلابنا مشوا الكلية وصوّروا حجم الضرر … المنظر كان وجع ، لكن في مقبل الأيام حتكون البداية البترجع ليها الروح ✊🏽

📌 الخطوة الأولى :

1. تحسين واجهة الكلية بعربة النظافة (اللودر) عشان نشيل التراب والأوساخ القدام الكلية + نصلّح الحيطة والباب ونركب بنر جديد.

2. تجهيز مظلة الإستراحة الكبيرة.

دي أول خطوة … ومنها الطريق طويل لكن بالإصرار ح نوقف الكلية على كرعينها.
الحضور مهم ، المشاركة أهم ، وعزيمتنا هي الفيصل.

الهندسة بيتنا .. وبإيدينا ح نقيفها من جديد ❤️

12/08/2025

بسم الله الرحمن الرحيم.

بيان(1)

بيان تصعيد و إدانة و استنكار
نحن لجنة طلاب كلية هندسة-جامعة النيلين، نعبر عن بالغ استيائنا ورفضنا القاطع لما يجري داخل كلية الهندسة بجامعة النيلين من ممارسات و إهمال إداري و أكاديمي فاضح عكس ما تحاول الادارة ترويجه في الإعلام على صفحات الكلية او على بعض صفحاتهم الشخصية، و ندين بشدة و أعمق عبارات الألم و الحسرة إدارة الكلية بمختلف درجاتها على ما يلي:

1. انشغال العميدة في الفترة الماضية بمعالجة بعض القضايا الجزئية مثل مشكلة نظافة الكلية،و الترويج على منصات التواصل الإجتماعي مع تجاهل قضايا أكبر وأعمق تأثيراً على الطلاب، مثل تأخر صدور النتيجة المعلقة منذ عشرة أشهر وتعطّل سير العملية التعليمية، الأمر الذي انعكس سلباً على المصلحة الأكاديمية للطلاب.

2. السلوك غير المهني لنائب العميدة، والذي لا يليق يتناسب مع منصبه الأكاديمي و يعكس ضعفاً في المسؤولية و عدم احترام للمؤسسة التعليمية.

3. عدم إهتمام المشرفين الأكاديميين بالطلبة الخريجين، وغياب المتابعة الجدية لمشاريعهم و بحوثهم و تقدمهم الدراسي.

4. امتناع بعض أعضاء هيئة التدريس عن تسليم المناهج و شرحها بسبب إنشغالهم بأشغال أخرى أو إختلافهم مع الادارة الحالية، ما تسبب في تعطيل العملية التعليمية وحرمان الطلاب من حقهم في إكمال المناهج في الوقت المحدد.

5. عدم رد أغلبية الدكاترة على اللجنة المختصة، وهو أمر يعكس الاستهتار المؤسسي و غياب الشفافية و التعاون.

6. تكليف اللجنة بالمهام الإدارية من ( حصر الطلاب و اماكن تواجدهم / البحث عن مراكز للابات / البحث عن مراكز للامتحانات..و الكثير من التفاصيل ستذكر لاحقاً ).

7. التهرب من إعلان نتائج التعويضي لأكثر من 6 أشهر و إعطاء وعود أقل ما يقال عنها وعود تتسم بالمماطلة .

8. عدم وضع تقويم سنوي عمدا لجميع الدفعات مما يزيد من سوء الأوضاع. ..
💢عليه قررت اللجنة الآتي:
1. سيتم إظهار كل الحقائق للإعلام و أمام الملأ و كشف كل التفاصيل من قبل الحرب حتى ساعة هذا البيان.
2. سيستمر التصعيد بلا هوادة وفق الالية المتفق عليها من قبل اللجنة بالتعاون مع ليدرات جميع الأقسام بمختلف الفرق.
3. سيتم إرفاق كل الدلائل و البراهين ( محادثات / إتصالات / إجتماعات ) التي تثبت صحة تعنت الادارة ككل و بعض الدكاترة و إسهامهم في وقف عجلة التعليم داخل كلية هندسة.
4. على إدارة الكلية الإلتزام بجدول زمني حددته لجنة الطلاب بناء على تصريحات بعض منسوبيها( المسجل الأكاديمي/ نائب العميدة / رؤساء الأقسام ) .

⚠️ نؤكد أن هذه الممارسات تمثل إخلالاً خطيراً بالمسؤوليات الأكاديمية والمهنية، وإضراراً مباشراً بسمعة الجامعة ومستقبل طلابها.
نطالب إدارة الجامعة بالتدخل العاجل واتخاذ الإجراءات الرادعة فوراً، لضمان تصحيح هذا الوضع المأساوي وحماية العملية التعليمية من مزيد من الانهيار.

وعليه، فإننا نحتفظ بحقنا الكامل في اتخاذ كل الخطوات التصعيدية المشروعة و الردع الاعلامي إذا لم يتم الاستجابة لمطالبنا بشكل عاجل وفعّال.

[2025/08/12]
[لجنة طلاب كلية هندسة-جامعة النيلين]Dalia Mahmoud

18/02/2025

هندسة تواصل التفرد 🔥🔥

تتذكرو الجملة دي كانت نهاية كل شنو 🤍
⭕ دوري الاقسام _ كلية هندسة :
بإذن الله راجعين بقوة لي واحدة من اهم الفعاليات داخل الكلية .
ح نرجع لإكمال الدوري ونرجّع كل التفاصيل الفقدناها فترة الحرب .
مع اقتراب تحرير الخرطوم بشكل نهائي ، وانتصار الجيش في جميع المحاور نقدم ليهم كل الدعم ❤️ بإذن الله راجعين يا هندستنا . 🔥🔥

#كسرة وحدة من المواقف الطريفة أيام الدوري ⬇️

05/08/2023

م مشتاقين لي صوت أصحابكم وونستهم ؟
حوش الكلية ؟
قهوة مظبوطة من عم صالح ؟
صحبة وقعدة يكونو الكيف ؟
ضربة في كتفك لمن تسرح (ركز ياخ انا قاعد اشرح) وترجع تمسك نفس الصفحه في نفس الشيت ؟
أوقات القراية والسهر والمبيت مع الاصحاب عشان تذاكرو شيتات السنة كلها في أيام قبل الامتحان !
بحث طالع مشروع نازل ، تستات وأعمال سنة ؟
م مشتاقين لي انت وين ؟ انا جنبك ياخ ، وانت تكون من بيتكم م طلعت ؟
ضجة قاعة وشيل اتندس ؟
والضحكات والقعدات في إحصاء والجبنات ؟
طعم الفتة النكهتها شير وزحمة الكفتيريا ؟
ما مشتاقين ..؟! 🤍

خش احكي لينا مشتاق لشنو فيها ؟
وكل الحاجات دي #حترجع بإذن الله ولو بعد حين 🤍

لايك وشير للبوست عشان يصلكم كل جديد ❤️

31/07/2023

ولسه مواصلين معاكم في سلسلة ، شاركونا بأهم التفاصيل و الذكريات ليكم في كلية الهندسة ب مراسلتنا على رسائل الصفحة 💛

يلا راسلنا منتظر شنو 🤩؟
فرحنا ب حكايتك 💛


هندسة يا بيتنا الجميل 🤍

لايك وشير للبوست عشان يصلكم كل جديد ❤️

انا من الثانوي كان رغبتي اكون مهندس مدني ، شاء الله انه يقبلوني في قسم الهندسة الكيميائية فبقيت متحير لمدة من الزمن وراس...
29/07/2023

انا من الثانوي كان رغبتي اكون مهندس مدني ، شاء الله انه يقبلوني في قسم الهندسة الكيميائية فبقيت متحير لمدة من الزمن وراسي بقي جايط وعيوني شايفة معادلات ورموز ومركبات وحاجات كدا من الخيال العلمي بتاع الكيمياء وذلك لاني مابعرف عن الهندسة الكيميائية اي حاجة (كان قدم لي اخوي رحمه الله) فبقيت مترقب نزول الجامعة عشان اعرف حاجة ونزلنا الحمدلله وبدأت المسيرة والصورة بدأت تتشكل في راسي وذلك بفضل الله ثم دكاترتنا الأجلاء لكن لسسة الواحد في نفسه اسئله كتيرة والمعالم ضبابية إلى أن جاء الحدث الذي غير المفاهيم بصورة كبيرة ألا وهو إسبوع المهندس.
ويرجع الفضل فيه بعد الله لسنايرنا والدفعات القدامنا . كان اسبوع مميز من ناحية المشاريع والافكار والتدريب والمنافسة بين المشاريع . فبفضل الله كان الإسبوع دا سبب كبير إنه افهم جزء من مهام المهندس الكيميائي في الصناعات المختلفة وكذلك فهمت عدد من الصناعات بصورة كبيرة وممتعة لبساطة الشرح وجمال التصميم للمشاريع وتسلسلها وكان سبب مهم في إني بديت أحب الهندسة الكيميائية ومنها بدأت رحلة التعلم بمفاهيم مختلفة.

بقلم : مازن فاروق
الدفعة : 4 كيميائية


هندسة يا بيتنا الجميل 🤍

لايك وشير للبوست عشان يصلكم كل جديد ❤️

السلام عليكم ورحمه الله وبركاته.كلية الهندسة جامعة النيلين ، طبعا في مقولة بتقول انو الحاجة ما بتحس بقيمتها الا بعد تفقد...
27/07/2023

السلام عليكم ورحمه الله وبركاته.
كلية الهندسة جامعة النيلين ، طبعا في مقولة بتقول انو الحاجة ما بتحس بقيمتها الا بعد تفقدها والحاجة دي اختبرناها كلنا مع الحاصل دة حاليا ومن ضمن الحاجات الفاقدها واشتاق ليها الجامعة وشلة الجامعة والطلعة من الصباح عشان تحصل محاضرة 7 (الما حضرتها غير مرة وحدة ربنا يغفر 🤣) وتجي خاشي من الصباح يلقاك يوسف بوشو الباش داك ويلقاك فداسي اديك كلمتين كدة يفتح نفسك لليوم 🤍✨ وبعدهم تلقا الشايقي لابس الشحاط حقو سفينة نوح داك 🤣🤣🤣 ينسيك انو انت ف كلية وانك بتقرا اصلاً (وف النهاية العدوى اصابتنا 😂) وتحضر محاضرتك الاولى وبعداك تشوف برنامج الفطور اللي هو بنجي عشانه ولو م حصلته كأنو اليوم فاتك 😂 المهم تمشي علي البوش واللي بكون مشوارو عبارة عن الولي وعبد الرحمن مشغلنها لوالي الدين وتنمر مشية وجية وضحك لمن بضحك معانا هو زاتو 🤣🤣🤣 وصوت ضحكة الولي البجيب اخر الشارع الفاضحنا محل ما نمش الا نسكتو 😂😂 وبشير جايط مع الشايقي وعبد العزيز انو ميسي العب زول ما فاضل الا يدقهم 🤣 ، المهم وبعد م تاكل الفتة من يد خبيريها ترس ووالي الدين سلمت اناملكم يااخي امتعتونا جدا والله 💛✨ ، بعدها نجي راجعين نشوف المحاضرة الحننوم فيها بعد المنوم الاكلناهو دة 😂 وبعداك منها للجبنة وديك كلامها براهو فكدة اليوم بكون انتهى والمواقف كتيرة ومختلفة منها ايام الامتحانات ، المعسكرات والمشاريع ما حابي اطول عليكم ..

اما بالنسبة للجانب العلمي فالكلية ما شاء الله غنية عن التعريف بدكاترتها بروف مصطفى/بروف اسماعيل الأزهري /بروف امين وباقي الدكاترة الافاضل ، لكن الحاجة الكانت مميزة بالنسبة لي او لمعظم الدفع في الوقت داك هم مساعدين التدريس ( اللي بقوا اصحابنا في النهاية ) ومعاملتهم واهتمامهم بالطالب وتقديرهم ليهو ولمجهودو والحاجة دي ورونا ليها (احمد عوض/فكتور) والتالت كان ادانا الكهربية في دبلومات م بتذكر اسمو (عندي مشكلة مع اسامي الدكاترة والاساتذة😂)المهم ما قصروا معانا ابداً والله وللان بساعدوا فينا جزاهم الله عنا كل خير ..

والحاجة العملت منعطف جميل في السنين الاخيرة دي وحركت الركود التفاعلي الكان حاصل من اخر فعالية هو اسبوع المهندس ، ودة تقريباً احسن حاجة حصلت في اخر 4 او 5 سنين للكلية ، وبما انو كنت من التيم المنظم وبحكم منصبي ك HR شايف التعب والمحهود الجبار الاتبذل من قبل الطلبة في كل اللجان من تعب وجري وطلعة من الكلية آخر اليوم والضغط المتواصل على مدى ايام وغير الناس الكان باتت ودة لو اشار لحاجة فبشير لانو الطلبة قلبهم علي الكلية وممكن يعملو اي شي عشان سمعتها و عشان يطوروها وإن شاء الله السنين الجاية الكلية بيهم حتكون غير ❤️🔥🔥
ومن هنا برسل تحية للجنة الأكاديمية فرداً فرداً وبعتذر اذا شغلتها لزول او اتضايق مني 😂🤍✨

انا شخصيا استفدت من الاسبوع حاجات كتيرة سواءاً اكاديمية او من ناحية مهارات وخبرة علمية او تنظيمية بس بفضل اهم شي العلاقات ثم العلاقات والحمد لله طلعت بناس ما فيهم كلام وخيرة طلبة الكلية لكم مني سلام اينما كنتم ♥️ وربنا يديم الود والمحبة ❤️✨

اما الدفعة دي كلامها تاني خاالص رغم الاختلاف في الاراء وطريقة التفكير بس اثبتوا انو هم اسرة وبيت وااحد قولاً وفعلاً والله وما حصل اتخاذلوا او اتاخروا ويشهدوا علي الكلام دة 💙
حاسوب 23 كل الحب والتقدير والله وإن شاء الله كلكم بخير 💙💙✨

فبختم بحاجة حابي اقولها انو الجامعة ما مباني او محاضرات او امتحانات وخلاص الجامعة دي عبارة عن مجتمع وبيئة ، مجتمع بتلقى فيهو كل انواع الشخصيات بمختلف فكرهم ومعتقداتهم وأساليبهم ، وبيئة بتجهزك لحياة ما بعد التخرج بتلقى فيها الضغط وتلقى فيها تغيير مسارات وتغيير خطط وبتنمي فيها شخصيتك بدون ما تشعر حسب الكنت بتمارسو لمن تجي الكلية وفي الفترة ديك فممكن فيها تطور من مهاراتك وتزيد من امكانياتك من الناس الفيها ، او تعاملها كأنك في مدرسة تجي وتطلع بدون ما تستفيد حاجة ، وكلو برجع ليك ولهدفك ، واخر شي حاول ركز علي العلاقات اهم حاجة لانو ممكن تأثر علي توظيفك بعدين غير انو حتحتاج ليها شديد.
وشكراً ..

بقلم : احمد محمد حسن (مكاوي)
الدفعة : 23 حاسوب


هندسة يا بيتنا الجميل 🤍

لايك وشير للبوست عشان يصلكم كل جديد ❤️

درست واتخرجت واتعينت فيها ، وما حاسة اني عندي رغبة اشتغل في أي مكان غيرها ، انتماء غريب وحب ما عادي لكليتنا بالرغم من أن...
25/07/2023

درست واتخرجت واتعينت فيها ، وما حاسة اني عندي رغبة اشتغل في أي مكان غيرها ، انتماء غريب وحب ما عادي لكليتنا بالرغم من أني شخص نادر ما يحس بالانتماء ..
لمن كنت طالبة اكتر مواد كانت بتجهجهنا مواد دكتور احمد الحسن وبروف أزهري (اكتر محاضرة كنت بحبها حقت أزهري بالرغم من أني بجيب جيد طوالي في مادتو 🙂) ...
تكون طالب .. فجأة تبقى زميل مع الدكاترة الدرسوك مع حفظ المقامات طبعا .. وفجأة تلقى طالب انت درسته بقى زميل ليك وحاجة في منتهى السريالية 😂..
كل الدفع الدرستها ليها مكانة عندي ، ومكانة خاسة خاسة للدفعة ٢١ 😂 💙 البعرفهم بالاسم .. بفقدوني طوالي وبسألوا مني .. ويلاقوني في الحوش يوقفوني يسلموا علي .. ممتنة ليهم شديد جدا ؛ بسببهم حبيت التدريس .
إن شاء الله الأوضاع المأساوية دي تنتهي ونرجع تاني أحسن من أول 💙

بقلم : صفاء سليمان
الدفعة : 17 حاسوب


هندسة يا بيتنا الجميل 🤍

لايك وشير للبوست عشان يصلكم كل جديد ❤️

جامعة النيلين كلية الهندسة: مهما أتكلم عنها ما حأوفي حقها ولا جزء بسيط من الايام العشناها فيها ، وما بتعرف قيمة الايام و...
23/07/2023

جامعة النيلين كلية الهندسة:
مهما أتكلم عنها ما حأوفي حقها ولا جزء بسيط من الايام العشناها فيها ، وما بتعرف قيمة الايام واللحظات دي الا بعد تفارقها ،، ومتأكدة اي زول اتخرج حيكون وصله احساسي ده
لمن تتكلم عن هندسة النيلين فأنت بتتكلم عن كيان واحد، "بيتك التاني" البتلقى نفسك فيه وبتحس فيه بالانتماء.

كليتنا كانت مميزة من كل النواحي ،ابتداءً من مبانيها اللي لمت الناس وخلتنا نتعرف على بعض اكتر، يعني انت ک طالب جديد ، جيت الكلية وما عارف اي شي ، كل يوم بتتعرف على دفعتك وسنايرك اللي بكونوا مرشدين وقادرين يوجهوك بكل صدر رحب ..
بتلقى الأساتذة ومساعدي التدريس والدكاترة حرفياً متاحين ومكاتبهم مفتوحة في اي وقت ممكن تسألهم وتستشيرهم وما بتطلع منهم الا وانت في كامل الرضا عن المعلومات الاخدتها منهم .

أكتر شي كنت بحبه في كليتنا اهتمام ادارتها عن تطويرها،، بتذكر اول سنة ما كان عندنا مكتبة في الكلية ، فكنا بنمش مبنى دبلومات عشان نذاكر في المكتبة ونكتب البحوث والواجبات البتطلب مننا ، السنة التانية طوالي اتعملت لينا مكتبة في مبنى بكالريوس وبتذكر للآن فرحتنا بيها، وكيف كانت الناس بتتشجع عشان تقرأ في المكتبة وتبحث وتعرف عن مجالها أكتر، ف ده بثبت انه ادارة الكلية كانت مهتمة اهتمام كامل بتوفير المصادر الكافية للطالب من أجل المعرفة.

من الحاجات البحبها فيها محاضرات الساعة ٨ ، وده لأنو الاحساس البجيك وانت ماشي على الجامعة وجو الصباح الظريف داك ، ومنظر الكلية وهي نظيفة وريحة شاي عمو صالح ،، دي كلها حاجات تشجعك انك تنتبه ف المحاضرة وتستوعبها اكتر من اي محاضرة في زمن تاني.
برضو كنت بحب روح التعاون الكان في دفعتنا، كنا دايما بنساعد بعض وخاصة أيام اسابيع المهندس ،، قعداتنا واجتماعاتنا عشان نطلع بأفكار جديدة لاسبوع المهندس، واحساس انك زول رهيب كده تحس نفسك مهندس فعلا وانت قاعد بتظبط مشروعك وسط ناس بعيدين في المجال، سناير علي برالمة واساتذة كلنا كده قاعدين بنظبط في الافكار عشان نطلع بمشاريع ونمازج مصغرة تفيد المجتمع وتساعد على ايجاد الحلول المناسبة.

المميز في كليتنا انها بتضغطك ضغطة كده ب فايدة (ضغط بناء) 😁 ، ما بتديك مجال ترتاح فيه الا وتعرف اي معلومة وتعرف الغرض الاساسي من المادة الانت بتدرسها دي ، الطريقة الاتعمل بيها المنهج كفيلة تخليك لمن تتخرج جاهز تماما لسوق العمل وده ما حتحس بيو الا
لمن تمش دورة تدريبيه أو كورس في مجالك ويكون معاك عدد من الناس في كليات مختلفة ، حتعرف قدر شنو انك انت عارف معلومات وفاهمها وهم اول مرة يسمعوا بيها ، وده م تقليل من مناهج الجامعات السودانية التانية بس ده بدل على حرص الادارة انه توفر المنهج الشامل البغطي جزء كبير من المجال.

هندسة النيلين حلوة بكل الفيها ، ب مبانيها قاعاتها ولاباتها ،دكاترتها الكانوا في يوم من طلابها وقصصهم الناجحة في الكلية براها بتديك دفعة وتشجيع انك تجتهد وتبقى زيهم، اساتذتها ومساعدي التدريس والطلاب اللي فيوم حيطلعوا من أميز المهندسين ، اللي قادرين يشتغلوا تحت الضغط وقادرين يبدعوا ويتميزوا وينتجوا افكار وحلول مبتكرة وجديدة (ودي حقائق ما وجهة نظر).

بقلم :عزة يوسف
دفعة 18

هندسة اتصالات


هندسة يا بيتنا الجميل🤍

⭕أسبوع المهندس طبعا حكايتو حكاية ....تقريباً من دخلت الجامعه حضرتو مرتين لما كنت في سنة اولي ولما كنت في سنة تانية والح...
21/07/2023

⭕أسبوع المهندس طبعا حكايتو حكاية ....
تقريباً من دخلت الجامعه حضرتو مرتين لما كنت في سنة اولي ولما كنت في سنة تانية والحمدلله بعدها أوضاع البلد إتشقلبت فوق وتحت وأمورنا جاطت والناس بقت بتفتش ل إنو تكمل قرايتها قبل م الأوضاع تزيد سوء ف م كنا مهتمين شديد بيه لحدي م الشباب الورانا بدو يتحركو ويسعو ل إمكانية قيام إسبوع المهندس مرة تانية بس المرة دي الحاجة الإختلفت انو المتطلبات والحدث الفريد من نوعو دا بمجهودات طلابية بحتة منهم الاستخدم علاقاتو الخارجية ومنهم الاستخدم مهارتو الفردية وقدر يتحصل علي تمويل خارجي وطبعاَ دا كلو كان مجرد فكرة لسه م طبقوها عل أرض الواقع ف سبحان الله إتكلم معانا واحد من زملائي انو في الناس شغاله تجهيز في اسبوع المهندس وكان بلوم فينا انتو وين من الموضوع وليه ماف اي زول ممثلنا معاهم الشباب ديل شغالين ومجتهدين وهم برالمتنا
ودي كانت اول خطوة إتخذتها لمشاركتي في الاسبوع وبديت أبحث عن المسؤول والليدر بتاع الشباب ديل ووصلت ليه وإتكلمت معاه وفهمني الحاصل كلو وبديت معاه .
⭕ فكانت أجمل مشاركة لأنها عرفتني على شباب وشابات عيونهم وقلوبهم على الكلية......
الشاهد على الكلام دا إنو لحدي الان إسبوع المهندس محفور في ذهني ومتذكرو تفصيلة تفصيلة وأحداثو كلها حاضرة لدرجة م لاقي مفردات أعبر بيها ....
ف التحية والتقدير لكل اللجان الاشتغلت في اسبوع المهندس فرداً فرداً وبالأخص لجنة التنظيم والله قدر م اتكلم م ح اقدر أوفيكم حقكم

بقلم : محمد فتح الرحمن (الملا)
الدفعة : 22 إتصالات


هندسة يا بيتنا الجميل 🤍

لايك وشير للبوست عشان يصلكم كل جديد ❤️

السلام عليكم ورحمة الله تعالى وبركاتهجامعة النيلين عموما وكلية الهندسة خصوصا ليها مكانه خاصه في قلبي انا حرفيا ارتباطي ...
19/07/2023

السلام عليكم ورحمة الله تعالى وبركاته

جامعة النيلين عموما وكلية الهندسة خصوصا ليها مكانه خاصه في قلبي انا حرفيا ارتباطي بالجامعة غير. ارتباط وجداني قبل يبقا اكاديمي انا دخلتها 201‪7 انا اخترتها حتي قبل اخش الجامعه الكان بقول جامعة الخرطوم البقول السودان بس انا كان هدفي النيلين 😂😂😂قدمت كل تخصصات الموجودة في النيلين وأولها اتصالات والحمدلله شالوني فيها الكل كانو م عاجباهم البقول لي الصين الشعبيه وناس جباره الخواطر والباكمبا بس انا نظرتي ليها كانت غير دخلتها برلومة كانت سنة دوشه عرفنا فيها الجامعة سنه تانية كنا سلكنا حبه وعرفنا الجامعه عملنا معارف(وهنا بدت الشُهره😂😂) تقريبا انا في تانيه عرفت نص دفعتي وجزو من باقي الاقسام المعاي والبرالمه(والسناير كنا بنخاف منهم😂😂😂كانو بمرمطو الزول) وهنا بدت رحله الإجازات القيصريه في السمستر التاني من تانيه قفلو المظاهرات 10 شهور وبرضو م يئست والله😂😂😂كنا بنقول فتره وتعدي وفعلا نزلنا بعدها شهر 10 \201‪9 امتحنا تانيه ونزلنا تالته قلنا الأمور مشت الحمدالله فجاءة ظهرت كورونا 😂😂😂😂قفلوها تاني ونحن الحمدلله م يئسنا برضو في كورونا اجزنا تقريبا سنه او اقل نزلنا شهر 7/202‪1 امتحنا واجزنا لي بعد الأضحي بي سبب تراكم الدفع بعد نزلنا رابع والحمدلله رابع دي قصه براها اكتر سنه علمتي كتير من نواحي غير الاكاديميه يعني انا في السنه دي عرفت فيها برالمه وسناير كميه وعرفت فيها دفعه 201‪9 ناس ماشاء الله جمعتني اكتر حاجه بيهم اسبوع المهندس كان من اكتر الفعاليات العلمتني كتير كسرت حاجز الخوف والرهاب الاجتماعي من الناس في الشرح للناس في المشاريع (الرادار والباركن الروبوت والبلاين) كلها احلا من بعض احلا حاجه كان الاسبوع القبل اسبوع المهندس كان عباره شغل في المشاريع وتاني الرسم والتلوين واحلا حاجه كنت شغاله باستمتاع وكان معاي اصحابي وبرالمتي الحلوين من هنا ليهم سلام قدر م اتكلم م بخلص بعد الأسبوع طلعت بي ناس كتيره ماشاءالله بالنسبه لي قدوه وتاني اتوالت الفعاليات الجمعتنا كتيره اكتر انا اتغيرت كتير في السنه دي وفهمي اتغير 180‪ درجه للأحسن الكليه لو حبيتها بتحبك بحس كأنها اتعملت عشانك انت وبس والاساتذه كلهم من غير استثناء بعاملوك بأسلوب راقي ومرن الصغير بعاملك كاخ والكبير كأب حرفيا كأنكم عيله ♥️♥️♥️والكلية بيتنا والقاعات غرفنا والدفعة اخوانك ودفعتي دي دايره بوست براه يخ قدر م اتكلم عنهم م بوفيه وكل ذكري احلا من التانيه وقعداتنا في القاعه ونستنا والشرح البكون بدون تمييز ولا زنقه الامتحانات وطلعات اخر الامتحانات🥺🥺🥺وفي دي بتذكر اصحابي وقعداتنا في إحصاء للشرح ومكالمات قوقل والفطور والحوش وجبنات إحصاء وشارع الضياع ودكان البوش وجامعه السودان ومكتبه ريحانه(ومن هنا برسل سلام من القلب لي ريحانه كل اصحابي المعاها) وحوش الجامعه واللابات حقت الكليه ولاب المايكرو (الكنا بنبكي فيه) ولابات (عثمان وضوينا الف سلام ليهم♥️) ولابات (عم عبدالرحمن😢فاقدها ) والقاعات والاستراحه 😭😭😭 فقدت الكليه كلها الحرب دي قطعت اهم سنه في الجامعه انا فقدت اصحابي وحوش الجامعه وكل شي يارب ترجع الخرطوم وترجع الجامعه زي م كانت ❤️❤️❤️🌹

بقلم : قباء كمال محمد
الدفعة : 22 اتصالات


هندسة يا بيتنا الجميل 🤍

لايك وشير للبوست عشان يصلكم كل جديد ❤️

Address

Khartoum

Website

Alerts

Be the first to know and let us send you an email when ANU Engineering Event posts news and promotions. Your email address will not be used for any other purpose, and you can unsubscribe at any time.

Contact The Business

Send a message to ANU Engineering Event:

Shortcuts

Share

Category