20/09/2026
کوہاٹ: علاقہ بنگش امامیہ علماء کونسل کوہاٹ کے رہنما علامہ سید قیصر عباس میاں نے صحافی مہدی عباس بنگش سے گفتگو کرتے ہوئے کوہاٹ پولیس لائن مسجد میں نمازِ جمعہ کے دوران ہونے والے بم دھماکے کی شدید مذمت کی۔
انہوں نے کہا کہ عبادت گاہ میں نمازیوں کو نشانہ بنانا انسانیت سوز درندگی ہے۔ دہشت گردوں کا اسلام، پاکستان اور امن سے کوئی تعلق نہیں؛ ان کا بنیادی ایجنڈا اسلام اور پاکستان دشمنی ہے۔
علامہ سید قیصر عباس میاں نے کہا کہ بعض معاملات پر عوام کو سکیورٹی اداروں سے اختلاف ہوسکتا ہے، لیکن ایسے سانحات میں ہم سب سے پہلے پاکستانی ہیں۔ شہداء کے جنازے ان کے گھروں تک پہنچنا پورے کوہاٹ کے لیے انتہائی تکلیف دہ لمحہ ہے۔ امن اور ملکی سلامتی ہمیں سب سے زیادہ عزیز ہے۔
انہوں نے کہا کہ علاقہ بنگش امامیہ علماء کونسل اس مشکل گھڑی میں پولیس اور سکیورٹی فورسز کے شانہ بشانہ کھڑی ہے۔ انہوں نے دھماکے میں شہید ہونے والے پولیس اہلکاروں اور عام شہریوں کے اہلِ خانہ سے دلی تعزیت کرتے ہوئے شہداء کے درجات کی بلندی اور زخمیوں کی جلد صحت یابی کے لیے دعا کی۔
