18/08/2023
پیاری لڑکیو!
جن کی نئی نئی شادی ہوئی ہے۔
ایک ننھا سا مشورہ قبول فرمائیے۔ شادی کے بعد لڑکی کو
Hormonal changes, environmental changes, new relations, home sickness, fear of marriage
وغیرہ کی وجہ سے ذہنی دباؤ، اداسی، کسی سے ملنے کا جی نہ چاہنا، تنہائی کی طلب، زندگی سے بے رغبتی وغیرہ جیسی کیفیات محسوس ہو سکتی ہیں۔
ایسے میں شوہر کی صورت میں ایک ہمدرد دکھائی دے رہا ہوتا ہے جس سے آپ دل کی کوئی بھی بات کر سکتے ہیں
ماضی، حال مستقبل سب کے متعلق ہر خیال کا اشتراک کر سکتے ہیں۔
بار بار اداس ہونا، مایوسی بھری باتیں، والدین کی یاد میں آنسو آنا اور یہ سب شوہر کے ساتھ شیئر کرتے جانا یعنی کچھ ایسے کہ آپ کے ان مسائل کا اثر آپ کے شوہر پہ بھی ہو رہا ہو۔ وہ خوشی اور پریکٹیکل سوچ کے ساتھ سب کر رہا ہو لیکن آپ یہاں ایک الگ دنیا بسائے بیٹھی ہیں جو کہ سمجھ آتی ہے۔ مگر یہ بات کچھ دیر تک آپ کا شوہر محبت و مروت میں سمجھ سکتا ہے پھر وہ اس سلسلے سے اکتانے لگتا ہے۔ ہمدردی بھری باتیں بے فکری یا لاپروائی میں بدل سکتی ہیں جو کہ تکلیف دہ ہو سکتا ہے۔ لہذا اس مسئلے کو سمجھداری سے وقت پہ ہی سنبھال لیجیے۔
شوہر کے ساتھ اپنی اداسی کو اتنا مت شیئر کریں۔ اس کے لیے کوئی اور فرد تلاش کیجیے۔ اس شخص نے آپ کے ساتھ زندگی کا سفر پہلے طے نہیں کیا، آپ کے ماضی کے مسائل اس کے مسائل نہیں رہے۔ آپ کی گھر سے دوری کو وہ اس طرح سمجھ نہیں سکتا۔ آپ کے ہارمونل چینجز کی اسے گہرائی سے سمجھ نہیں آ سکتی۔ اس لیے دل کو ذرا سنبھالیے اور سوچ سمجھ کے مختلف اقدام کیجیے۔ ایسے ہی جیسے ہم کسی نئے قائم ہوئے تعلق کو لے کے چلتے ہیں۔
کچھ خیال سے کچھ لحاظ سے۔ اسے یک لخت زندگی کی تمام کہانی نہیں کہہ ڈالتے۔ میکے کے علاوہ اپنا دوست، ساتھی یا کاؤنسلر چنیے جس سے اپنے احساسات شیئر کر سکیں اور بروقت درست مشورہ حاصل کر سکیں۔
(عفیفہ شمسی)
