26/07/2026
๐๐ง๐ ๐๐๐ ๐ค๐๐ค๐๐ฌ๐๐ฅ ๐ฌ๐ ๐๐จ๐จ๐ ๐ง๐ ๐๐ ๐ฅ๐๐ฌ๐ข๐ ๐๐ข ๐๐ซ๐ข๐ฌ๐ญ๐จ โฅ๏ธ
ANG DAPAT AY MAGING TAPAT SA ASAWANG MINAMAHAL, AT ANG TANGI MONG PAG-IBIG, IUKOL SA KANIYA LAMANG [Kawikaan 5:15]
" Ang pinapagsama nga ng Diyos ay huwag papaghiwalayin ng tao." (Mat. 19:6)
Itinuro ito ng Panginoong Jesucristo batay sa aral at tuntunin ng Diyos ukol sa lalake at babae na ikinakasal upang sila'y magsama bilang mag-asawa. Subalit ito ay tila baga nawalan na ng kabuluhan ng maraming mag-asawa ng sanlibutan. Kaya nakasusumpong tayong mag-asawa na humahantong sa paghihiwalay( Broken marriages ) na nagiging dahilan ng mga wasak na tahanan( Broken homes )
Ang mga mag-asawa na lingkod ng Diyos ay hindi dapat humantong sa ganitong mapait na karanasan. Upang manatiling matatag at maligaya ang pagsasama ng mag-asawa ay dapat nilang matupad sa buhay nila ang panukala ng Diyos sa mag-asawa.
Kaya ano ang panukala ng Diyos sa paglalang ng pag-aasawa?
" Hindi mabuti na ang lalake ay mag-isa; siya'y ilalalang ko ng isang katulong niya." (Gen. 2:18)
Pinanukala ng Diyos na ang lalake ay magkaroon ng makakasama o makakatuwang upang magtulungan at magdamayan sila sa isa't isa na siyang landas ng matatag at maligayang pagsasama. Dapat ding maunawaan ng mga ikinakasal na ang kasal ay tipanang panghabambuhay. Sinabi ni Apostol Pablo:
" Sapagka't ang babae na may asawa ay itinali ng kautusan sa asawa samantalang ito ay nabubuhay; datapuwa't kung ang asawa'y mamatay, ay kalag na sa kautusan ng asawa." (Roma 7:2).
Sa seremonya ng kasal, ang ikakasal ay kapuwa manunumpa na sila'y nagmamahalan at tutuparin ang kautusan ng Diyos; sa hirap at ginhawa sila ay magsasama hanggang sa sila'y papaghiwalayin ng kamatayan( till death do them part )
Ang tungkulin ng lalake
Sinabi ni Apostol Pablo:
" Mga lalake, ibigin ninyo ang inyo-inyong asawa, at huwag kayong maging mapait sa kanila." (Col. 3:19)
Ang tagubiling ito ang sinusumpaang gaganapin ng lalaking ikinakasal. Siya ay nangangako sa Diyos at sa harap ng kaniyang mga saksi na ang babaing kaniyang pinakasalan lamang ang kaniyang tanging iibigin. Akay ng banal na takot sa Diyos , ni hindi niya dapat sirain ang sumpaang ito. Ang Biblia ay nagbabala:
" Huwag ninyong ibigin ang sinungaling na sumpa: sapagka't ang lahat na ito ay mga bagay na aking kinapopootan, sabi ng Panginoon."(Zak. 8:17)
Lubhang mahalaga ang basbas ng Panginoon para maging matatag at maligaya ang pagsasama ng mag-asawa. Upang matamo ng mag-asawa ang basbas ng Panginoon sa kanilang pagsasama, dapat tuparin ng lalake ang sinumpaan niyang pangako na iibigin niya ang kaniyang asawa. Nararapat lamang na ibigin ng lalake ang kaniyang asawa sapagkat ang babae ay hindi na iba sa kaniya. Nagmula siya sa lalake sapagkat sa lalake siya kinuha.
" At hinulugan ng Panginong Diyos ng di kawasang himbing ang lalake, at siya'y natulog: at kinuha ang isa sa kaniyang mga tadyang at pinapaghilom ang laman sa dakong yaon: At ang tadyang na kinuha ng Panginoong Diyos sa lalake ay ginawang isang babae, at ito'y dinala niya sa lalake. At sinabi ng lalake, Ito nga'y buto ng aking mga buto at laman ng aking laman: siya'y tatawaging Babae, sapagka't sa Lalake siya kinuha. Kaya't iiwan ng lalake ang kaniyang ama at ang kaniyang ina, at makikipisan sa kaniyangasawa: at sila'y magiging isang laman." (Gen. 2:21-24).
Ang unang taong si Adan ay nagsabi na ang babae " ay buto ng aking mga buto at laman ng aking laman." Kaya nga itinuro ni Apostol Pablo na ang lalake na umiibig sa asawa ay umiibig sa sariling katawan, at " walang sinoman na napoot kailan man sa kaniyang sariling katawan "(Efe. 5:29).
Kaya, hindi matuwid na kapootan ni saktan ng lalake ang kaniyang asawa. Itinatagubilin pa ni Apostol Pablo na, " huwag kayong maging mapait sa kanila."
Mapait at mahirap tanggapin ng isang lalake kung matuklasan niya na ang kaniyang asawa ay nakikiapid sa ibang lalake. Kaya hindi rin dapat gawin ng lalake ang makiapid sa ibang babae sapagkat ito ay magiging mapait at magiging lason sa damdamin ng kaniyang asawa. Kapuwa hindi nila dapat gawin ito.
Marami ng tahanan ang nawasak at marami nang mag-asawa ang nagkahiwalay dahil sa ganitong mapapait na karanasan sa panahon ng kanilang pagsasama.
Higit pa riyan ang sasapitin ng nakikiapid. Nagbabala si Apostol Pablo tungkol sa pakikiapid:
" Maging marangal nawa sa lahat ang pag-aasawa, at huwag nawang magkadungis ang higaan: sapagka't ang mga mapakiapid at mga mapangalunya ay pawang hahatulan ng Diyos." (Heb. 13:4)
Maselan ang unang taon ng pagsasama ng mag-asawa. Sa panahong ito nakikilala nila nang lubusan ang tunay na likas na pag-uugali ng isa't isa. Sa panahon ding ito nakikita ang mga hindi inaasahang kapintasan na hindi nila nakita sa isa't isa sa panahon ng pagliligawan at pagiging magkasintahan. Kapag nakita na nila ang mga kapintasang ito, dito maaaring pumasok sa puso't isip ang pagsisisi. Ito'y mapanganib dahil maaaring humantong sa panlalamig o pagkawala ng pag-ibig at magbunga ng hindi pagkakaunawaan at sa huli'y pagkawasak
Photo: DK Photography Studio
Church styling: Event To Cherish
