23/03/2020
ORATIO IMPERATA
(Panalangin para qñg pangacabus laban qñg 2019 Novel Corona Virus)
O Dios a lubus maiupaia at alang angga ming Ibpa, qñg mipnung cagalangan at capacumbaban lalapit cami q***a caniting caorasan ning quequeng masipit a pamangailangan.
Aduan mi q***a ing cambilan mu cami at ingatan laban qñg 2019 Novel Corona Virus (CoVid-19) a macamate at babie pasaquit caring dacal a tau.
Aduan mi ing gracia mu at pagcaluban mu lang sapat a beluan ding taung mipanibalan magaral nung nanu ia iti at nung nanu ing penibatan na niting "virus" at ing saquit a darala na niti, at nung macananu iang micacalat.
Abaian mu la at ituntun ding gamat at pamisip ding matenacan qñg pamanulu, at pamipacaiap ban macasuiu la caring masaquit, ing gobierno at ding pribadong ajencia a sucat manintun panulu at capaldanan caniting lalaganap a epidemia.
Ipanalangin mi la detang miaua na ing cumaiap na la sana qñg malalaguang panaun. Ipagcalam mu q***ami ing graciang magobra para qñg icacaiap da ring malda at ing macasaup caring atiu qñg pamangailangan.
Ipagcalam mu iti qñg capamilatan nang Jesucristong Anac mu at Guinu mi, a mabibie ampon mag-ari cambe mu, qñg cametungan ning Banal a Espiritu, Dios, mangga man qñg alang angga. Amen.
Santo Cristo Del Perdon, pacaluluan mu cami.
Banal a Maria, Indu ning Capaldanan, ipanalangin mu cami.
San Rafael Arcangel, ipanalangin mu cami.
San Roque, ipanalangin mu cami.
San Lorenzo Ruiz, ipanalangin mu cami.
San Pedro Calungsod, ipanalangin mu cami.
Indu ning Divina Gracia, ipanalangin mu cami.
