30/05/2025
Mootummaan Itoophiyaa lammiilee isaa Sa'ud Arabiyaatti duuti itti murtaa'e baraaruuf xiyyeeffannaa olaanaa fi saffisaan hojjachuu akka qabu maatiin lammiilee kanaa fi namoonni itti dhiheenyaan dhimmicha hordofan yaamicha dhiheessan.
Lammiilee Itoophiyaa Sa'ud Arabiyaan du'a itti murteessite mootummaan Itoophiyaa baraaruu dhabuun yaaddoo guddaa lammiilee Itoophiyaa biyyoota alaa jiraatanii ta'ee jira.
Lammiileen Itoophiyaa yeroo garagaraatti daangaa Yamanii fi Sa'ud Arabiyaa irratti baala sammuu namaa hadoochu waliin qabaman kibba Sa'ud Arabiyaa magaalaa Naajiraan mana hidhaa Sijinaal Ammii jedhamu keessatti waggaa 5-9 hidhamuun murteen du'aa itti murtaa'e eeggataa jiru.
Lammiileen kunniin dallaalota daddabarsa namaa seeraan alaa irratti bobba'aniin baala sammuu namaa hadhoochu dirqamaan baachifamuun gara Sa'ud Arabiyaa seensisuuf osoo yaalanii daangaa irratti humnoota tikaa biyyattiitiin qabaman.
Lammiileen kun rakkoowwan garaagaraatiin baqatani biyyaa bahuu malee baala sammuu namaa hadhoochu geejjibsiisuuf kaayyoo akka hin qabnee fi gariin isaanii waan dallaalli itti kennee deemi jedheenu akka hin beekne OMNtti himani jiru.
Fulbaana bara 2024 keessa lammiileen Itoophiyaa kibba Sa’ud Arabiyaa Magaalaa Naajiraan mana hidhaa Sijinaal Ammii jedhamu keessatti hidhaman duuti itti murtaa'e.
Bara 2024 keessaa murtiin du'aa irratti murtaa'uu hordofee namoonni lama kan maqaan isaanii Mohaammad Ahmad Shaqab fi Abdallaa Yuusuf Elemoo jedhaman kan dhalootaan Oromiyaa bahaa Harargee ta'an irratti murteen darbe gaafa Fulbaana 25 bara 2024 raawwatamuun ajjeefaman isaa OMN gabaasuun isaa ni yaadatama.
Caamsaa 20 bara 2025 namoonni lama kan maqaan isaanii Abdulsalaam Jamaal Mohaammad fi Abdulsamad Naggii Mohaammad jedhaman baafamanii murteen du'aa irratti raawwatame.
Caamsaa 21, 2025 waaree booda namoota lama kan maqaan isaanii Badhaasoo Mohaammad Jundii dhalataa Harargee Lixaa Aanaa Daaroo Labuu Magaalaa Milqaaye ta'ee fi Abdulqaadir Mohaammad Siraj dhalataa Harargee bahaa Aanaa Malkaa Bal'oo ta'e irratti murteen du'aa itti murtaa'e raawwatame.
Maatiin lammiilee kanaa lubbuu isaanii oolchuuf gandaa kaasee hanga mootummaa federaalatti iyyatanis furmaanni hin argamne.
Mootummaa Itoophiyaa, Ministeerri dhimma alaa Itoophiyaa fi embaasiin Itoophiyaa Sa'ud Arabiyaa jiru mootummaa Sa'ud Arabiyaatiif xalayaa yeroo garagaraatti barreessaa turanis Sa'udiin murteen du'aa darbee hin jijjiiramu jechuun diduu maatiin OMNtti himani jiru.
Tibbana ammoo xalayaan laammiileen kun ayyaana Arafaa dura akka ajjeefaman jettu bulchiinsa mana hidhaa Sijinaal Ammiif ergamuu kan himan maddeen OMN, hidhamtoonni kunniin maatii isaani akka dubbisan taasifamuu himani jiru.
Sababbiin mootummaan Itoophiyaa lammiilee kana du'a irraa baraaruu dadhabeef sababa rakkoo dippiloomaasii Itoophiyaa fi Saud Arabiyaa jidduu jiruuf ta'u kan himan maddeen dhimma kana itti dhiheenyaan hordofan, kun ammoo lammiilee biyyattii kutaalee addunyaa garagaraa keessa jiraataniif yaaddoo guddaadha jedhu.
Mootummaan Itoophiyaa nageenya lammiilee isaa tiksuu fi hordofuu qaba jechuun mootummaan lammiilee biiyyota ormaa jiranaiif xiyyeefannaa akka kennu gaafatani jiru.
Lammiilee duuti itti murtaa'e kanneen baraaruuf mootummaan Itoophiyaa xiyyeeffannoo olaanaan akka hojjatus gaafataniiru.
