24/08/2024
नारी र पुरुष एक-अर्काका दुश्मन हैनन् । एकाध आपराधिक घटनालाई देखाएर एक अर्का प्रति विष ओकल्ने हाम्रो प्रवृत्ति प्रकृतिको खिलाफ छ । प्रकृत्तिले नै हामीलाई जोडिदिएको छ । बिहेकै चलन नचलेको भए पनि हामी कुनै न कुनै रूपमा जोडिन्थ्यौं, यो अकाट्य छ ।
जुन कुरा अकाट्य छ, त्यही कुरालाई हाम्रो चलन, परम्परा र परिवारले स्विकारेर, सकारेर, सजाएर हामीलाई दिएको छ । यसो सोचौं त, त्यो अकाट्य सम्बन्धलाई जोगाउन हामीले कति पहल गरेका छौं ?!
स्त्री-पुरुषको सम्बन्ध शरीरको सम्बन्ध मात्र हैन, बिल्कुल सही । मनको हो, बिल्कुल सही । मनपछिको गन्तव्य के हो, प्रश्न यो पनि हो । तपाईंले सयौं वर्ष बाँचेका सम्बन्ध देख्नुभएको छ, पढ्नुभएको छ, सुन्नुभएको छ, शरीरले मात्र टिकेका होलान् त ? बिल्कुल हैन ।
सुवासले टिकेका हुन् । ती शरीरहरु बाट कुनै कालखण्डमा पैदा भएको सुवास, जसमा प्रेम नै प्रेम पोखिएको थियो, समर्पण नै समर्पण सिंचिएको थियो, ‘तिमी भन्दा अर्को र तिमी भन्दा ज्यादा कोही छैन’ भन्ने जबर्दस्त दावी लत्पतिएको थियो, हो त्यसैको मीठो सम्झनामा कट्ने हो बाँकी जीवन ।
कहाँ जोडिन्न शरीर सुवासिलो सम्बन्धमा ? हुरुक्कै हुँदा अंगालोमा जोडिन्न कि ? धुरुक्कै रूँदा काखमा जोडिन्न कि ? कमजोर हुँदा काँधमा जोडिन्न कि ? बलियो हुँदा कम्मरमा जोडिन्न ?
ती बदमास सम्झनाहरुमा दिल खोलेर हाँस्दा सजिलै कट्छ ‘शरीर चल्न छोडेपछिको जिन्दगी’ । ती सिरिंग बनाउने आफ्नै कथा र कथनीहरुमा लजाइलजाइ, जिस्क्याइ-जिस्किइ सजिलै कट्छ ‘कथाले माग्न छोडेपछिको जिन्दगी’ !
आगो- ईगो, कमाइ-पढाइ, रूप-ख्याती, सुविधा-सम्पत्ती…यी सबभन्दा माथि हुन्छन् खुसी वा दुःखमा जोडिएका अंगालोहरु, छोपिएका हातहरु, खप्टिएका खुट्टाहरु र टाँसिएका छातीहरू ! ‘म फलानो/फलानी हुँ’ भन्ने टकरार भन्दा ‘म फलानोको/फलानीको हुँ’ भन्ने करारमा हुन्छ सम्बन्धको आयु तय ।
कहिलेकाहिं बिस्तारालाई सोध्नुभएको छ, ‘तँ कति खुसी छस् हामीलाई देखेर’ भनी ! बिस्तरा बोल्दैन, तपाईं अभिनय गर्नुहुन्छ, म ताली बजाउँछु । देख्नेले जे देख्छन्, त्यही लेख्छन् - आहा, भगवानले जुराएको जोडी !!
भगवानले (प्रकृतिले) जुराएको नै हो भने एक्टिंग नगर्नुस्, नढाँट्नुस्- न अरुलाई, न आफूलाई ! आज ‘आहा’ भन्नेले भोली ‘छ्या’ भन्छन्, दोष उनीहरुको मात्र हैन, ऐना उनीहरुले पनि झुन्ड्याएका हुन्छन् घरमा ।
नसकिने सम्बन्धलाई जबर्जस्ति नघिसार्नुस् । कसलाई के देखाउनुछ र ? कसलाई के प्रमाणित गर्नुछ र ? आफ्नो आयु पुरा बाँच्नुस्, अर्कोलाई पनि बाँच्न दिनुस् ! ज्यान नलिनुस्, ज्यान नदिनुस् । दिनुपर्ने सम्मान हो, प्रेम हो ।
नसक्ने भए एक्लै रहनुस्, एक्लैमा अर्को आनन्द छ । 😷🤔
