22/12/2022
Takk for turen!♥️
2023 bankar på døra, og vi fire som står bak Gjendeguiden AS, vil gjerne takke alle gjestar og samarbeidspartnere som har vore med oss, fulgt oss og støtta oss, sidan oppstarten i 2016.
Vi har nå løyst opp selskapet etter ei lang og god vurdering. Denne avgjerda er udramatisk og har heldigvis minst med pandemi å gjera, sjøl om alt heng saman med alt. Vi fire har rett og slett meir enn nok med å følge opp våre andre arbeidsforhold, famile og forpliktelser. Å drive selskap på kveldstid er krevande.
Gjendeguiden vart etablert som eit "overskotsprosjekt" , med ønskje om å kunne tilby turistar og fastbuande trygge, lærerike og gode naturopplevingar i Ottadalen og Jotunheimen. Med reiselivskompetansen til Marius på Gjendesheim Turisthytte DNT og Harald Rune frå Gjendebåten i botten, laga Ørjan og Knut-Erik kurs og turar som vart særs ettertrakta, og skapa aktivitet både i høgsesong og lågsesong. Sjøl om vi fyrste åra hadde kun vinter og ski på programmet, vart det fort utvikla gode heilårs reiselivsprodukt, både til fots, på sykkel og i kajakk.
Høyt berre her;
👉Gjendeguiden var av dei fyrste som utvikla gode introduksjonskurs for alpin skiferd (randonee) og skredlære. Hundrevis har lært å ramle og reise seg på ski med oss.
👉Gjendeguiden etablerte, utvikla og drifta den høgt verdsette Besseggenpatrulja på oppdrag for det lokale reiselivet rundt Besseggen, seinare med støtte frå fylke og staten. Det vart omlag 250 turar over Besseggen til alle døgnets tider!
👉 Gjendeguiden var fyrste miljøsertifiserte aktivitetsbedrift i Nord Gudbrandsdalen. Stiftelsen Miljøfyrtårn
👉 Gjendeguiden var pådrivar for å få i stand ei nasjonal sykkelguideutdanning, og deltok på det fyrste NMIG kurset som vart gjennomført på Lemonsjøen.
👉Gjendeguiden inviterte til nærmiljøturar på sykkel, i kajakk og på ski, og "Grendarodeo" med Gjendeguiden var eit låkterskeltilbud som fekk mange opp av godstolen og ut på tur.
👉Gjendeguiden introduserte flattvannspadling og havkajakk for mange på Vågåvatnet med grunnkurs og teknikkurs etter Norges Padleforbund sin kursstige.
👉Gjendeguiden var med og støtta Lom skifestival med skiføring og utvikling av tematurar i fleire år.
👉Gjendeguiden hadde fokus på høgt servicenivå, høg kompetanse på vegledere, småe grupper og gode lokale matopplevingar. Det meste ligg til rette for store naturopplevingar i verdas beste klasserom, Jotunheimen.
⛷️♥️
I tillegg "opna" Gjendeguiden Besseggen på vinteren. Med fjellski og alpine turski fekk mange oppleve den sagnomsuste turen i si finaste vinterdrakt, nesten einsleg.
Gjendeguiden fekk mykje positiv mediemerksemd, spesielt med Besseggenpatrulja, og vi fekk mange flotte samarbeidspartnarar frå ulike hold. Vi sender ein varm takk til Norrøna og Sporten Beitostølen. Desse gav Gjendeguiden eit løft ved oppstart, og var solide støttespelarar i alle år. Seinare kobla Fischer Norge seg på med godt vinterutstyr til både nordisk og alpin skiferd, og Crispi Norge med fottøy. Takk også til Vågå kommune og Øystre Slidre kommune for velvilje og positiv innstilling.
I tillegg vil vi takke Norsk Luftambulanse, Vågå Røde Kors og Politiet i Innlandet for godt samarbeid med Besseggenpatrulja. Statistikken viser at det er fornuftig å vere føre var, ved å kunne vere tilstades før ting utviklar seg. Og berre så det er sagt; det er i hovedsak nordmenn som har hatt behov for ei hjelpande hånd over Besseggen..🤗
Alle andre aktørar, førerar, vegleiarar og turistvertar som vi har arbeidd saman med; tusen takk for mykje moro og gode turminner!
Tusen takk til Kjell Erik Reinhardtsen Photography for fine bilder, stødig føring og godt turfølge gjennom heile reisa vår!
Vi håpar at yngre krefter kan finne motivasjon og tid til å etablere seg som aktivitetsleverandør for heimfjell og høgfjell i Vågå. Pandemien spesielt, og ei uroleg verd generelt, har ført til at folk i enno større grad vender seg til skog og fjell, for å samle overskot og renske hugu! Mange både ønskjer og treng stødig turfølgje. Hansken er kasta!
Sjøl om selskapet Gjendeguiden AS er historie er Gjendeguidene høgst oppegående. Ørjan har hendene fulle i Forsvaret, og Knut-Erik er klar for ny vinter som skivegleder. Du finn han som "Besseggen Fjellsport" på SoMe og ellers der det er ufyseleg, kvitt og kaldt. Harald Rune og Marius er fortsatt ivrige skippere på kvar si skute ved Gjende.
Vi ønskjer alle ei fin førjulstid, og håpar folk finn fram fjellskia og ruslar ein tur mellom fjellbjørk og snaufjell. Å få låg vintersol rett i ansiktet er nesten like godt som å bade i ribbefett!⛷️😃
Kos deg med bilder av trivelege gjestar på tur dei siste seks åra. No er det din tur!♥️
Helsing
Ørjan, Knut-Erik, Marius og Harald Rune
