29/12/2025
Firda Tidend:
Magnus Willlumsen har arbeidd med prosjektet "Ungdom i medvind" i ei årrekkje. Like før jul dukka to tidlegare deltakarar opp med ei uventa førjulsgåve.
Blå båtmotor med gullskrift.
"Krokpollen - gode minner du aldri vil glemme" står det på den eine sida av båtmotoren.
Denne førjulsgåva kom uventa på Magnus Willumsen: – Veldig rørande
Magnus Willlumsen har arbeidd med prosjektet "Ungdom i medvind" i ei årrekkje. Like før jul dukka to tidlegare deltakarar opp med ei uventa førjulsgåve.
- Det er veldig rørande når slike ting skjer, seier Magnus Willumsen.
Det var i 2010 breimningen starta prosjektet "Ungdom i medvind" i samarbeid med barnevernet.
Willumsen dreiv frå før Norsk Kystleir i Krokpollen mellom Bryggja og Måløy. Krokpollen, og seinare også Fureparken på Byrkjelo, har vore base for avlastingstilbodet "Ungdom i medvind" - eller meistringsskulen, som Willumsen helst kallar det.
Like før jul fekk han besøk av to tidlegare deltakarar, som hadde med ei spesiell førjulsgåve.
Fekk p***e med tauverk.
Willumsen og dei to gutane hadde sete inne og prata ei stund, før det vart klart at gutane hadde sett frå seg ei gåve ute i garasjen.
Willumsen fortel at dei to også var i Krokpollen fleire gongar i sommar, og at dei veit kva som trengst og er behov for der.
Den første delen av gåva var ein p***e med tauverk.
- Det var sikkert tauverk for betydelege beløp på p***en, fortel Willumsen.
- Ei trygg hamn
Den andre delen av gåva kan seiast å vere ei gjenbruksgåve.
Magnus Willumsen blei rørt over den forseggjorde førjulsgåva.
Ein av gutane fekk nemleg ein påhengsmotor av Willumsen for mange år sidan, ettersom guten hadde gummibåt - men ikkje motor. Motoren hadde starta og gått, men også hatt periodar der han ikkje gjekk.
Willumsen fortel at guten som fekk motoren har vorte både ein flink mekanikar og matros, og då dei to kom på besøk på Byrkjelo, hadde dei med same motoren i ny drakt.
Det var stor stas for Willumsen å sjå at motoren var overhala både inni og utanpå, lakkert i blått og gull, og med tekst på begge sider.
«Krokpollen er ikkje berre ei trygg hamn for mange båtar, men for mange ungdomar også» står det på eine sida, fortel han.
- Det er veldig, veldig rørande å sjå desse gutane bli skikkelege menneske og få verdige liv der dei skapar verdiar, og der dei utviklar hobbyar og ferdigheiter, og blir flinke til noko. Det har med eigenverdi å gjere, og det å kjenne meistring og lukke i livet, seier Willumsen.
Eigenverdi og meistring
Han er imponert over tanken og alt arbeidet som ligg bak.
- Det imponerer meg veldig at dei har ein empati, omtanke og omsorg, og kjem tilbake med motoren i ein heilt annan tilstand. Det er veldig reflektert gjort og veldig uventa, seier Willumsen.
- Det tyder på at det blir modne, reflektere menneske med omsorg. Det ser eg på som den aller største verdiskapinga, legg han til.
- Ei god tilbakemelding
I sommar feira Norsk Kystleir 25 år. Då var det også 15 år sidan "Ungdom i medvind" starta opp, og fram til då hadde 150 ungdommar vore med i tilbodet.
Willumsen fortel at det blir skapt sterke bindingar, vennskap og gjensidig respekt gjennom "Ungdom i medvind". Mange av ungdommane ønskjer å halde kontakten også i etterkant av å ha delteke, og Willumsen-familien har hatt besøk av fleire tidlegare medlemmer i desember.
Fleire tidlegare medlemmer kjem med førjulspresangar, og den forseggjorde motoren vart ein av dei. Willumsen er viss på at han ikkje skal i vatnet igjen.
- Han skulle eigentleg stått i ein glasmonter, seier han, og vedgår at han måtte felle ei tåre eller to etter gåveoverleveringa der i garasjen.
- Det er rett og slett ei god tilbakemelding på det vi driv med, seier Magnus Willumsen.
Benedikte Grov - Firda Tidend
