23/07/2026
لو المنافس طلب منك تدرّب له موظفين ببلاش… كنت هتوافق؟
من الحاجات المهمة اللي لازم تعملها عشان تحافظ على الكفاءات عندك، إنك تعمل Salary Survey كل 3 شهور على الأقل، وتعرف السوق رايح فين، والمرتبات وصلت لكام، والموظف الشاطر اللي عندك سعره بقى كام بره شركتك.
متستناش الموظف ييجي يقولك إنه عايز زيادة؛ لأن غالبًا لما الموظف الشاطر يطلبها، بيكون هو أصلًا عرف سعره في السوق، واتكلم مع شركات تانية، وممكن يكون العرض الجديد جاهز في إيده.
والأغرب بجد إن الموظف ييجي يقدم استقالته عشان جاله عرض أعلى، فتقاوح معاه وترفض تزود مرتبه، وتقبل استقالته باعتبار إنك هتجيب غيره بسهولة. وبعد ما يمشي، تنزل تدور في السوق فتكتشف إنك مش لاقي حد بنفس كفاءته بالمرتب اللي كنت بتدفعه، فتضطر في الآخر تعرض على الموظف الجديد مرتب أعلى من الرقم اللي الموظف القديم كان طالب يوصل له.
يعني تكون خسرت موظف فاهم الشغل، ودافع تكلفة تعيين وتدريب موظف جديد، ومستحمل فترة نقص الإنتاجية وأخطاء البداية، وفي الآخر رفعت المرتب برضه، لكن بعد ما دفعت فوقه تكلفة أكبر بكتير.
تخيّل إن موظف من أهم الناس عندك بيشتغل بمرتب أقل من السوق، وإنت سايبه مستني لحد ما يطلب حقه بنفسه. هو مش هيشوف إنك موفّر في التكاليف، هو هيشوف إنك عارف قيمته ومش مقدّره، أو إنك أصلًا مش عارف قيمته، وفي الحالتين أول شركة هتقدّره صح هتاخده منك.
متستناش الاستقالة عشان تكتشف إن مرتباتك بقت أقل من السوق. راجع مرتباتك قبل ما موظفينك يراجعوا عروض الشغل.
وعشان تعمل ده صح:
١- متعتمدش على مصدر واحد في معرفة المرتبات، وقارن بين شركات قريبة منك في الحجم والمجال والموقع الجغرافي.
٢- متساويش بين كل الموظفين في الزيادة؛ اربط الزيادة بقيمة الوظيفة، والأداء، والخبرة، ومدى صعوبة تعويض الموظف.
٣- راجع مرتبات الوظائف المهمة والحساسة بشكل أسرع، خصوصًا الوظائف اللي عليها طلب عالي في السوق.
٤- متبصش للمرتب الأساسي بس؛ قارن إجمالي المزايا، والحوافز، وفرص التعلم والترقي.
٥- لو ميزانية الشركة مش سامحة بتعديل كل المرتبات مرة واحدة، حدد الأولويات واعمل خطة واضحة للتعديل، بدل ما تسيب الفجوة تكبر لحد ما تخسر أهم الناس عندك.
تخيّل كده تجيب الموظف من نفسك وتقوله: إحنا عملنا بحث عن المرتبات في السوق، ولقينا إن قيمتك أعلى من مرتبك الحالي، وعشان كده قررنا نزود مرتبك للرقم ده، رغم إن العقد اللي بينا بيدينا الحق نكمّل بنفس المرتب.
تخيّل الرسالة دي هتعمل فيه إيه، وقد إيه هتحسسه إن الشركة شايفاه، ومقدّراه، وحريصة عليه قبل ما يطلب، أو يهدد، أو يجيب عرض من شركة تانية.
ساعتها الزيادة مش هتبقى مجرد فلوس… هتبقى رسالة واضحة: إحنا عارفين قيمتك، ومش مستنيين حد تاني يعرّفهالك. وفي نفس الوقت، إنت بترسّخ ثقافة تقدير وعدل، وبتبني بيئة عمل صحية الناس فيها تحس بالأمان والانتماء.
أما لو مرتباتك أقل من السوق، فإنت كده مش بتحافظ على موظفينك؛ إنت شغال مركز تدريب مجاني للمنافسين. بتعيّن، وتدرّب، وتستحمل أخطاء البداية، ولما الموظف يبقى جاهز وشاطر، شركة تانية تاخده منك بمرتب إنت كنت رافض تدفعه.
تامر الشاعر
استشاري الإدارة والتطوير الاستراتيجي للاعمال
----------
ربما فاتك جزء من المحتوى؛ لأن بعض المنشورات لا تظهر في التايم لاين. ندعوك إلى زيارة الصفحة والاطلاع عليها.
