11/09/2025
විදෙස්ගතව සැඟවෙමින් මෙරට මිනිස් ඝාතන සහ වෙඩි තැබීම් මෙහෙය වන පාතාල කෙරුමන් නිසා ශ්‍රී ලංකා පොලිසිය වසර කිහිපයක් පුරාම සිටියේ දැඩි ව්‍යාකූල තත්ත්වයකිනි. වෙඩි තැබීම් සිදුකරන වෙඩික්කරුවන් සහ ඊට ආධාර අනුබල දෙන්නවුන් කොටු කරගත හැකි වුවද ඔවුන් මෙහෙයවන පාතාල කෙරුමන් අල්ලා ගත නොහැකි වීම නිසා ඔවුන් විදෙස්ගතව සිට පුරසාරම් දොඩවමින් රිසි සේ හැසිරීම මෙම තත්ත්වය තවත් උග්‍ර කරලීමට සමත් විය. මේ බව මනාව තේරුම්ගත් වත්මන් පොලිස්පතිවරයා විදෙස්ගතව සිට වෙඩි තැබීම් මෙහෙය
වන ප්‍රබල සංවිධානාත්මක අපරාධකරුවකු වන කෙහෙල්බද්දර පද්මේ ඇතුළු සගයන් කොටුකර ගැනීමට සිදු කළ පොලිස් මෙහෙයුම ශ්‍රී ලංකා පොලිස් ඉතිහාසයේ සුවිශේෂී සුපිරි මෙහෙයුමක් විය. එහි ප්‍රතිඵලයක් ලෙස කෙහෙල්බද්දර පද්මේ ඇතුළු අපරාධකරුවන් පස්දෙනකු අත්අඩංගුවට ගෙන මෙරටට ගෙන ඒමට මෙරට පොලිස් නිලධාරීන් දෙදෙනකුට හැකි වීම ඇත්තෙන්ම අගය කළ යුත්තකි. මෙම සුපිරි මෙහෙයුම නිසා මෙරට පාතාලය මේ වන විට දැඩි නිහඬතාවක් පෙන්නුම් කරන අතර ශ්‍රී ලංකා පොලිසියට මේ නිසා ලැබුණු කීර්තිනාමය සුළුපටු නැත.
විවිධ රටවලදී කොටු වූ සහ අත්අඩංගුවට ගනු ලැබූ පාතාලයන් මෙරටට ගෙන ඒම මෙතෙක් පැවැති සම්ප්‍රදාය වුවද එය කණපිට හරවමින් තම ජීවිතයද නොතකා ප්‍රබල අපරාධකරුවන් පසුපස හඹා ගොස් වෙනත් රටකදී ඔවුන් අත්අඩංගුවට ගැනීමට ශ්‍රී ලංකා පොලිසියේ නිලධාරීන් දෙදෙනකුට හැකිවීම පොලිස් ඉතිහාසයේ මෙතෙක් නොදුටු දුර්ලභම සිදුවීමකි. සහකාර පොලිස් අධිකාරි රොහාන් ඕලුගල සහ මහින්ද ජයසුන්දර මෙම කර්තව්‍යයට උරදුන් පොලිස් නිලධාරීන්ය. ඕලුගල මේ වන විට බස්නාහිර උතුර පළාත් අපරාධ කොට්ඨාසයේ අධ්‍යක්ෂවරයා වන අතර ජයසුන්දර අපරාධ පරීක්ෂණ දෙපාර්තමේන්තුවේ රාජකාරි කරන්නේය.
කෙසේ වෙතත් මේ දෙදෙනාගෙන් සමන්විත කණ්ඩායමේ නායකයා වූයේ ඕලුගලය. ඕලු ඇත්තෙන්ම දක්ෂ නිලධාරියෙකි. ඔහු වැළලී ගිය අපරාධ සියයකට ආසන්න සංඛ්‍යාවක් විමර්ශන කොට ඊට සම්බන්ධවූවන් අත්අඩංගුවට ගත් අයෙකි.
රත්නපුර, කොටකෙතෙන, කහවත්ත ප්‍රදේශවල ඔහුගේ නම අතිශයින් ජනප්‍රියය. වරෙක ජනප්‍රියත්වයේ මුදුන්පෙත්තට ගිය ඕලු තවත් වරෙක පොලිසියේ කැපිලි කෙටිලිවලට මුහුණ දුන්නේය.
සම වයසේ පොලිසියට බැඳුණු බොහෝ නිලධාරීන් නියෝජ්‍ය පොලිස්පති ධුර පවා හොබවද්දී ඕලු තවමත් ඒ.ඇස්.පී. තනතුරේ රාජකාරියේ යෙදෙන්නේ ඒ කැපිලි කෙටිලි නිසාය. එහෙත් ඉකුත්දා සිදු කළ මෙම සුපිරි මෙහෙයුමත් සමඟ රොහාන් ඕලුගල නැවත කරළියට ආවේය. ඒ සෙසු කිසිවකුත් මෙවන් මෙහෙයුමකට උරදී නැති නිසාය. මෙය ශ්‍රී ලංකා පොලිස් ඉතිහාසයේ සුවිශේෂී මෙහෙයුමක් වන්නේද ඒ නිසාය.
කෙහෙල්බද්දර පද්මෙ, කමාන්ඩෝ සලින්ත කරළියට එන්නේ ගණේමුල්ල සංජීව නමැති පාතාල අපරාධකරු අධිකරණය තුළදී වෙඩි තබා මරා දැමීමත් සමඟය. මෙය පොලිසිය ඇතුළු සෙසු ආරක්ෂක අංශවලට එල්ල කළ මහත් අභියෝගයක් විය. විදෙස්ගතව සැඟවෙමින් ඔවුන් සිදු කළ එම සැලසුම් සහගත ඝාතනය තවත් උත්සුක වෙන්නේ ඉන් නොනැවතුණු පද්මෙ සහ සලින්ත ප්‍රධාන පොලිස් පරීක්ෂක ලින්ටන්ටද දුරකථනය හරහා මරණ තර්ජන එල්ල කිරීමත් සමඟය.
කෙහෙල්බද්දර පද්මෙ සහ කමාන්ඩෝ සලින්ත කොටු කරගත යුතු බවට ස්ථිර සැලසුමකට පොලිස්පතිවරයා ඇතුළු සෙසු නිලධාරීන් එන්නේ මෙම තර්ජනයත් සමඟය.
පද්මෙ ඒ වන විට සිටියේ ඉන්දුනීසියාවේය. ඒ බවට සඳහන් තොරතුරු පොලිස්පතිවරයාට ලැබෙන්නේ මෙහි ප්‍රතිඵලයක් ලෙසය. පද්මෙ කොටුකර ගැනීමේ මෙහෙයුම සැලසුම් කිරීම භාර වන්නේ රහස් පොලිසියේ ප්‍රධානියා වූ ජ්‍යෙෂ්ඨ නියෝජ්‍ය පොලිස්පති අසංක කරවිටටය. පද්මෙ සහ සලින්ත කොටුකරගත යුතු බවට මනාව තේරුම්ගත් පොලිස්පතිවරයා සහ ජ්‍යෙෂ්ඨ නියෝජ්‍ය පොලිස්පතිවරයා මෙම මෙහෙයුම භාරදෙනුයේ රොහාන් ඕලුගල සහ මහින්ද ජයසුන්දර යන පොලිස් නිලධාරීන් දෙදෙනාටය.
ඇත්තෙන්ම මෙය රහසිගත මෙහෙයුමක් විය.
‘අපි මේ කරන දේ ගෙදර වයිෆ්ටවත් දැනගන්න තියන්න එපා. එහෙම වුණොත් මේක ලීක් වෙන්න පුළුවන්.’
පොලිස්පතිවරයා දුන් ඔවදන් ඒ අයුරින්ම ඕලුගලත්, ජයසුන්දරත් රැකගත්හ.
‘’මම වයිෆ්ටත් මේක කිව්වේ නැහැ. මම ජපානයට යනවා කිව්වා. පොඩි ‘ට්‍රේනිං කෝස්’ එකකට….’’
ඇය සිය සැමියාගේ කතාව විශ්වාස කළාය. එසේ කී ඕලු සිය සගයා වූ මහින්ද සමඟ ජපානයට යන්නට පිටත් විය. ඒ ඉකුත් අගෝස්තු මස 23 වැනිදා අලුයම් කාලයේය. ඕලුගල සහ ජයසුන්දර කටුනායක ගුවන්තොටුපොළට පැමිණියේ සුපුරුදු පොලිස් නිලධාරීන් ලෙස නොවේ.
“මම ගෙදරට, යාළුවන්ට ජපානයට යනවා කිව්වට අපිට යන්න තිබුණේ ඉන්දුනීසියාවට. ඉන්දුනීසියාව බැඩ්මින්ටන්වලට ප්‍රසිද්ධ රටක්. ඒ නිසා අපි ගියේත් බැඩ්මින්ටන් කෝච්ලා විදියට. පොලිස් නිලධාරීන් විදියට නෙවෙයි. ඇත්තම කියනවා නම් අපි ඒ විදියට ඇඳුම් ඇඳලා බැඩ්මින්ටන් රැකටුත් අරගෙන තමයි ප්ලේන් එකට නැග්ගේ..”.
ඕලුගල සිය ගමන ඇරැඹූ ආකාරය කියන්නේය. වෙනත් ඇඳුමකින් සැරසී සිටි නිසාදෝ ගුවන්තොටුපොළේදී හෝ ඕලුගලව කිසිවකුටත් එකවර හඳුනා ගැනීමට නොහැකි විය. ඔහුගේ සගයා ඒ වන විට ප්‍රධාන පොලිස් පරීක්ෂක රාජකාරියේ යෙදුණු අතර ඔහු වැඩිය දැක පුරුදු නැති නිසා ජයසුන්දර කොහොමටවත් කිසිවකු හඳුනා ගත්තේ නැත.
පෙරවරු 7.20ට කටුනායකින් ගමන් ඇරැඹූ මොවුන් ඉන්දුනීසියාවට ගොඩ බැස්සේ එරට වෙලාවෙන් සවස 2.45ටය.
“අපි පළමු පාරට මිලියනපතියෝ වුණේ එහෙදී. අපි අරන් ගියේ ඩොලර් 200යි. ඒක ඉන්දුනීසියා එයාර්පෝර්ට් එකේ මාරු කළාම මිලියන තුනක් ලැබුණා. අපි මුල් වතාවට මිලියනපතියන් වුණා.
ඕලුගල සිනහවෙමින් සතුට පළ කරන්නට විය. ඒ වන විට රාජකාරි මට්ටමින් සියල්ල සූදානම් වී තිබිණි. පොලිස්පතිවරයාගේ උපදෙස් මත ජ්‍යෙෂ්ඨ නියෝජ්‍ය පොලිස්පති අසංක කරවිට මෙන්ම අපරාධ පරීක්ෂණ දෙපාර්තමේන්තුවේ ජාත්‍යන්තර පොලිස් ශාඛාවේ ස්ථානාධිපති ප්‍රධාන පොලිස් පරීක්ෂක රාජකරුණා ඇතුළු කණ්ඩායම මෙරට ඉන්දුනීසියානු තානාපති කාර්යාලය සහ ඉන්දුනීසියා පොලිස්පතිවරයා ඇතුළු නිලධාරීන් සම්බන්ධ කර ගනිමින් කෙහෙල්බද්දර පද්මෙ සහ කමාන්ඩෝ සලින්ත කොටුකර ගැනීමේ මෙහෙයුමට අදාළ උපදෙස් සියල්ල වනවිටත් සංවිධානය කර තිබිණි.
“අපි ඉන්දුනීසියාව ගැන, ඒ රටේ ජකර්තා නුවර ගැන, ඒ රටේ මිනිසුන් ජීවත්වන ආකාරය ගැන පොඩි දැනුමක් අරගෙන තමයි ගියේ. අපිට ඔන්ලයින් හරහා වෙන් කරලා තිබුණා ජකර්තා සිකෝන් කියන පැත්තේ හෝටලයක පොඩි කාමරයක්. ලොකු පහසුකම් ඒකේ තිබුණේ නැහැ. අපි ඒවා ගැන හිතුවෙත් නැහැ. අපි ආවේ මිෂන් එකකටනේ. අපේ ටාගට් එක තිබුණේ මිෂන් එක විතරයි.”
“ඉන්දුනීසියාවේ මිනිස්සු සේරම එක හැඩරුව. අපි එයාලගේ භාෂාව දන්නෙත් නැහැ. දූපත් විතරක් 18,000ක් විතර තියෙනවා. ලංකාව වගේ විසි නව ගුණයක් විශාල රටක්. ජකර්තා කියන්නේ පැය 24 පුරාම ජනාකීර්ණ නගරයක්.
‘අපි හෝටල් කාමරයේ හිටියේ ඉන්දියන්කාරයෝ විදිහට. ලංකාවෙන් ගිය හැඩය අපි එහෙදී වෙනස් කරලා ඉන්දියන් කාරයෝ විදිහට තමයි හැසිරුණේ.”
“ඉන්දුනීසියාවේ එම්බසි එකේ අපේ නිලධාරිනියක් අපිට උදවු කළා. ඇත්තෙන්ම අපිට තේරුණා ඇය හොඳාකාරවම අපිට උදවු කරන බව.”
ඕලුගල කීවේය. ඒ අනුව එදිනම රාත්‍රි 11ට මොවුන්ට ඉන්දුනීසියානු අන්තර්ජාතික පොලිසියේ කපිතාන් ජතෝන් මුණගැසීමට අවස්ථාව උදා විය. ඕලු සම්බන්ධ කර තිබුණේ මෙරට බලධාරීන්ය.
“අපි පැය දෙකක් විතර ‘මිෂන්’ එක ගැන එයාලත් එක්ක සාකච්ඡා කළා.
පස්සේ අපිට ලැබුණු තොරතුරුවලට අනුව කෙහෙල්බද්දර පද්මෙ ගැන සොයන්න පටන් ගත්තා. වාහනයක් නැති එක අපිට ලොකු ගැටලුවක් වුණා. භාෂාව දන්නෙත් නැහැ. කැබ් සර්විස් 15ක් විතර තිබුණා. ඒ සේරම යන්නේ ඇප්වලින්. අතේ සල්ලි තිබුණට සල්ලි ගෙවලා යන්න බැහැ ඇප් නිසා. පයින්ම තමයි වැඩිපුර ගියේ.”
“ඔහොම යනකොට අපිට කැබ් එකක ඩ්‍රයිවර් කෙනෙක් සෙට් වුණා. අපි මිනිහට බැගෑපත් වුණා. මිනිහා ඇප් එක ඕෆ් කරලා අපිත් එක්ක යන්න එකඟ වුණා. අපි ගියා සෙන්ට්‍රල් ජකර්තාවල බටාවියා කියන නගරයට. මිනිහා හරහා සිම් එකකුත් අරගෙන ඇප් එකකුත් දාගත්තා. පද්මෙයි සලින්තයි බටාවියාවේ එපාර්ට්මන්ට් එකක ඉන්නවා කියලයි අපිට තොරතුරු ලැබීලා තිබුණේ.”
“ඒ එපාර්ට්මන්ට් එකට යන්න බැහැ. හයි සිකියුරිටි. ඒ අතරේ අපිට තොරතුරු තිබුණා පද්මෙ ඒ එපාර්ට්මන්ට් එක ළඟ ජිමි එකකට එනවා කියලා. හොයලා බලද්දි ඒ වගේ එකම නමින් ජිම් 05ක් විතර තිබුණා.”
“අපි හිතුවා මෙයා එන්න ඕන එපාර්ට්මන්ට් එක ළඟම තියෙන ජිම් එකට තමයි කියලා. අපි ඒක හොයාගෙන ගියා. ඒ ජිම් එක ඉස්සරහ පොඩි කඩයක් තියෙනවා. අපි ඒ කඩේට වෙලා හැංගිලා බලාගෙන හිටියා පද්මෙ ඒ ජිම් එකට එයිද කියලා. ඉරිදා රෑ දොළහ වෙනකම් හිටියත් පද්මෙලා ආවේ නැහැ. කවුරුත් අපි ගැන සැක කළෙත් නැහැ රෑටත් ඒ නගර ජනාකීර්ණ නිසා.
එදින රාත්‍රිය ඔවුන් තද නින්දකට වැටුණත් නිදිදෙව්දුව ඔවුන් වැළඳගත්තේ නැත. ඒ ඔවුන් නිතරම තම කාර්යය ගැන අවදියෙන් සිටි නිසාය. ඒ අතර ඕලුගල තම පොලිස්පතිවරයා සහ ජ්‍යෙෂ්ඨ නියෝජ්‍ය පොලිස්පති කරවිට සමඟ දුරකථනය හරහා සම්බන්ධකම් පැවැත්වීය. පසුවදා ජකර්තා නගරයේ ස්ථාපිත මෙට්‍රෝජයා පොලිස් මූලස්ථානයේ 11 වැනි මහලේදී ඉන්දුනීසියානු කපිතාන් ජාකෝන් ඇතුළු නිලධරීන් සමඟ සාකච්ඡාවක් පැවැති අතර එය සාර්ථක විය.
“එතැනදි අපි දැනගත්තා ඒ රටේ නීතිය අනුව කිසිම පුද්ගලයකු අපිට ඇරස්ට් කරන්න බැහැ කියලා. ඉන්දුනීසියන් සීඅයිඩී එකට තමයි ඇරස්ට් කරන්න පුළුවන් කියලා. ඒ නිසා මට සැකයක් ආවා අපි ඉන්දුනීසියාවට ආවා කියලා පද්මෙලාට තොරතුරු යන්න පුළුවන් කියලා…. අපේ ගමන ලීක් වෙයි කියලා….”
“ඔන්න ඔහොම සැකයෙන් තමයි අපි හිටියේ. දවසක් අපි පද්මෙලා හොයා ගන්න ලොකු උත්සාහයක් ගත්තා. පද්මෙලා ඉන්නවා කියපු බටාවියා ෆ්ලැට් එක ළඟ තියෙනවා ෂොපින් මෝල් එකක්. අපි ඔය මෝල් එකට ගියා. ඒකෙ අයිස්ක්‍රීම් විකුණන කඩයකට ගිහින් අයිස්ක්‍රීම් දෙකක් කකා ඉන්නකොට මම දැක්කා පද්මෙයි, සලින්තයි අපි ඉස්සරහින් යනවා. පද්මෙ මගෙ දිහා බැලුවා. මම වෙනස් ස්වරූපයක හිටිය නිසා පද්මෙට මාව හඳුනගන්න බැරි වුණා.
“මට ලොකු අසරණකමක් දැනුණා. උන්ව අල්ල ගන්න බැරි නිසා. එයාලව ඒ රටේදි අල්ලන්න අපිට බලයක් නැහැ. මම කවදාවත් ජීවිතේට එහෙම ඉවසලත් නැහැ. මම පුදුම ඉවසීමක් ඉවසුවා. ඒත් අපි තහවුරු කරගත්තා පද්මෙයි, සලින්තයි එපාර්ට්මන්ට් එකේ ඉන්නවා කියලා. ඒකට සතුටක් දැනුණා.”
ඕලුගල සිය අත්දැකීම් එකිනෙක විස්තර කරන්නට විය.
පද්මෙ සහ සලින්ත තමා සියැසින් දුටු බව ඕලුගල ඉහළ නිලධාරීන්ට දැනුම් දුන්නේය. පසුව 26 වැනිදා අඟහරුවාදා ඕලුගල සහ ජයසුන්දර නැවත ජකර්තා හි “මෙට්‍රෝජයා” පොලිසියේදී එරට විශේෂ කණ්ඩායමක් හමුවී සාකච්ඡා කළහ.
“අපි එයාලට කිව්වා අපිට ඕන දෙන්නා අපි දැක්කා. එයාලා ඉන්නේ අර එපාර්ට්මන්ට් එකේ කියලා. අපිට ලැබුණු ටීම් එක දැක්කම මට පුදුම සතුටක් දැනුණා. අපේ වැඩේට සෙට් වෙච්ච ටීම් එකක් කියලා මම ඒ ගැන කරවිට මහත්තයාට කිව්වා. පින්තූරයකුත් දැම්මා ටීම් එකේ.”
“ඒත් මෙයාලා වැඩේ කරන්න පරක්කු වුණා. අපි හිතුවා පද්මෙයි සලින්තයි ඉන්න තැන අපි කිව්වම මෙයාලා ගිහින් උන්ව අල්ලයි කියලා. අපිට යන්න බැහැනේ. එයාලා අපිට කිව්වා ඔයාලා එන්නත් එපා. අපි ගිහින් උන්ව අල්ල ගන්නම් කියලා.”
“ඒත් කියපු විධියට වැඩේ වුණේ නැති නිසා මට ෂුවර් එකක් තිබුණේ නැහැ. පස්සේ අපි තීරණය කළා අපි දෙන්නා තනියම හරි මේ ගේම ගහනවා කියලා. මම කරවිට මහත්තයට කිව්වා සර්…. මේක පරක්කු වුණොත් ලීක් වෙන්න පුළුවන්. බැරිම නම් අපි දෙන්නා හරි ගේම ගහනවා කියලා.” 27 වැනිදා එයාල කිව්වා එදා රේඩ් එක කරනවා අපිට එන්න එපා කියලා. ඒත් එයාලට රේඩ් එක කරන්න පරක්කු වුණා ඕඩර්ස් ලැබුණේ නැහැ කියලා. ඒ අතරේ තමයි පද්මෙයි සලින්තයි එපාර්ට්මන්ට් එකෙන් පැනලා ගිහින් තිබුණේ.”
“මට මාර දුකක් ඇති වුණා අතට අහුවුණු කට්ටිය පැනලා ගිය එකට. පස්සේ අපි ගිහින් සීසීටීවී කැමරා බැලුවා. ඒවයෙන් පෙනුණා පද්මෙ, සලින්ත වගේම නිලංගත් බෑග් අරගෙන කැබ් එකකින් පැනලා යන දර්ශන.
“පස්සෙ මම ඉන්දුනීසියානු ටීම් එකත් දැනුවත් කරලා උන් පස්සේ පැන්නුවා. උන් කාර් පහක්ම මාරු කර කර යනවා. බ්ලූ බර්ඩ්ම තුනක්. ඔහොම කිලෝමීටර් හැටක් විතර ගිහින් උන් නතර වුණු ලොකේෂන් එක හොයා ගත්තා. තාක්ෂණික ක්‍රමත් භාවිත කරලා තමයි ඒ තැන් සොයා ගත්තේ. මෙයාලා ගිහින් තිබුණේ හිටිය එපාර්ට්මන්ට් එකේ ඉඳලා කිලෝමීටර් 8ක දුර තැනකට. ඒත් ඒකට යන්න මෙයාලා කිලෝමීටර් 60ක් විතර රවුමේ ගියා.”
“ඒ එපාර්ට්මන්ට් එක AKR ගැලරි වෙස්ට් කියලා එකක්. සුපිරි එපාර්ට්මන්ට් එකක්. “හයි” සිකියුරිටි තියෙන තැනක්.”
“අපි දෙන්නා වාහනේට වෙලා බලා හිටියා. අපිට එන්න එපා කියලා ඉන්දුනීසියන් ටීම් එක ඒ එපාර්ට්මන්ට් එක ඇතුළට ගියා. රෑ 10.30ට විතර ඇති. ඒ වෙලාවේ අපි දැක්ක බැකෝ සමන් ලොබි එකේ ඉන්නවා. ටික වෙලාවකින් කමාන්ඩෝ සලින්තත් එතැනට ආවා. මම ටක් ගාලා ඉන්දුනීසියන් කට්ටියට කිව්වම එයාලා පැනලා ඒ දෙන්නව අල්ලගත්තා. පස්සේ අපිත් එතැනට ගියා. පස්සේ එයාලත් එක්කම 27 වැනි තට්ටුවට ගිහින් එයාලා හිටිය කාමරයක් ඇරගත්තා. පද්මෙයි, තැඹිලි ලහිරුයි, බැකෝ සමන්ගේ ගෑනියි ඇතුළේ හිටියා. සේරම රෑට කෑම කන්න සූදානම් වෙලා හිටියේ.
ඉන්දුනීසියාවේ නිලධාරීන් ඒ සේරමගේ අතපය බැන්දා හෙල්ලෙන්නවත් බැරි වෙන්න. කටට ගම් ප්ලාස්ටර් පවා දැම්මා. කතා කරගන්නවත් බැහැ. එහෙම තමයි මෙයාලා ජකර්තා පොලිසියට ගෙනාවේ.”
ඕලුගලට දැනුණේ පුදුම සතුටකි. ඒ පද්මෙ ඇතුළු ගෝල බාලයන් පස්දෙනා අත්අඩංගුවට ගැනීමට හැකි වීම නිසාය.
“අපි ගියේ පද්මෙවයි සලින්තවයි ටාගට් කරගෙන. ඒත් ඒ දෙන්නත් එක්ක බැකෝ සමනුයි, කුඩු නිලංගයි, තැඹිලි ලහිරුයි අහුවුණා. ඒක නම් ඇත්තෙන්ම අපිට ලැබුණු බෝනස් එකක්.
“උන් ටික ‘මෙට්‍රෝජායා’පොලිසියට ගෙනාවා. එයාලට කතා කරගන්නවත් බැහැ ගම් ටේප් ගහලා කටවල්වලට. මට දුකත් හිතුණා. මම කටේ තිබුණු ගම් ටේප් එක ගලවල මොනවද ඕන කියල පද්මෙගෙන් ඇහැව්වා. සර් මට වතුර ටිකක් දෙන්න කිව්වා. මම වතුර ටිකක් දුන්නම පද්මෙ ඇහැව්වා සර්ලා නේද බටාවියා මෝල් එකේ අයිස්ක්‍රීම් කඩේ ළඟ අයිස්ක්‍රීම් කකා හිටියේ කියලා. මට හිනා ගියා.”
“මම සර්ලව දැක්කා ඒත් හඳුන ගත්තේ නැහැ. ඕලුගල සර් මෙහෙට ආවා කියල අපිට ඔත්තුව ලැබුණා. අපි එක තැනකට එකතුවෙලා තුර්කියට යන්නයි හිටියේ. ඒත් අපිට කලින් සර්ලා ඉක්මන් වුණා කියලා පද්මෙ මට කිව්වා ඕලුගල කීවේය.
“කොහොම හරි මෙයාල ලංකාවට ගේන එකත් ප්‍රශ්නයක් වුණා. ඒ ඉන්දුනීසියාවයි ලංකාවයි සැකකරුවන් හුවමාරු කිරීමේ ගිවිසුමක් ගහල තිබුණේ නැති නිසා. ඒකටත් පොලිස්පතිතුමා මැදිහත් වෙලා ඒ රටේ පොලිස්පතිවරයාත් එක්ක සාකච්ඡා කළා.
අනික තමයි ඒ වෙනකොට ඒ රටේ අරගලයක් තිබුණා. පොලිසිවලට ගහන්න කැරැලිකාරයෝ පටන් ගත්තා. මට තොරතුරක් ලැබුණා. ඒ අස්සේ රුපියල් කෝටි 35ක් දීල මුන් ටිකට පැනල යන්න හදනවා කියල. මම කරවිට මහත්තයට කතා කරලා මේක කිව්වා. කරවිට මහත්තයා පොලිස්පතිතුමාට කතා කළා. ජනාධිපතිතුමා පාන්දර 4 විතර වෙනකම් අපිත් එක්ක සම්බන්ධ වෙලා “නැහැ අදම ඒ කට්ටිය ගේන්න ඕන” කියලා තීරණය කරල විජේපාල ඇමැතිතුමයි ලේකම්තුමයි සම්බන්ධ කරගෙන තිබුණා.”
“ජනාධිපතිතුමා සම්බන්ධ වුණේ නැත්නම් මේක කරන්න ටිකක් අමාරුවෙනවා. පහුවදා මෙට්‍රෝජයා පොලිසියට කැරැලිකාරයෝ ගැහැව්වා. එතකොට අපි ලංකාවට එන්න පිටත් වෙලා. එහෙම ගහනකොට කූඩුවෙන් පැනලා යන්නයි පද්මෙලාගේ සෙට්එක හිටියේ. අන්තිමට ඒකත් බැරි වුණා.” ඕලුගල කීවේය.
“අපි මේ මිෂන් එකට ගොඩක් කැපවුණා. අපි හිඟන්නෝ වගේ පාරේ නිදා ගත්තේ නැහැ. ඒත් අපි හිඟන්නෝ වගේ හිටියේ. පැය විසිහතරේම පද්මෙලා එපාර්ට්මන්ට් එකෙන් පනී කියල පාරේ තැන් තැන්වල බංකුවල, පුටුවල වාඩිවේවී පැය විසිහතරේම එපාර්ට්මන්ට් එක දිහා බලාගෙනයි හිටියේ. අනික මම ගිය දවස් ටිකට නූඩ්ල්ස් එකක් විතරයි එහෙන් කෑවේ. අනිත් දවස්වල කෑවේම පලතුරු. එහෙ පලතුරු ලාබයි. මිදි ඇති තරම් කෑවා. බඩගිනි හැදුණාම සාක්කුවේ දාගෙන මිදි කෑවා.”
ජනාධිපතිවරයා, මහජන ආරක්ෂක ඇමැතිවරයා එහි ලේකම්, පොලිස්පති සහ ජ්‍යෙෂ්ඨ නියෝජ්‍ය පොලිස්පති කරවිට ඇතුළු කණ්ඩායමේ සහාය නොලැබුණේ නම් මෙම අපරාධකරුවන් මෙරටට රැ‍ගෙන ඒමට නොහැකි බව ඔහු අවධාරණය කරන්නේය. කෙසේ වෙතත් ඕලුගල සහ ජයසුන්දර කළ මෙම නිර්භීත ක්‍රියාව මේ වන විට බලධාරීන්ගේ පමණක් නොව මුළු රටේම මහජන පැසසුමට පවා ලක්වී හමාරය. ඒ ඇත්තෙන්ම මෙය සුවිශේෂී මෙහෙයුමක් නිසාය. බරපතළ අපරාධකරුවන් කොටුකර ගැනීමට තම ජීවිත පවා පරදුවට තබා මොවුන් ගිය ගමන ශ්‍රී ලංකා පොලිස් ඉතිහාසයේ සදා නොමැකෙන ලෙස සටහන් වන මෙහෙයුමක් බව පවසන්නේ ඒ නිසාය. ඕලුගල සහ ජයසුන්දර නිලධාරීන් දෙදෙනා තව නොබෝ දිනකින් උසස් වීම් ලැබීමට නියමිතය. ඒ ඔවුන් කළ සුවිශේෂී මෙහෙයුමෙන් මුළු පොලිසියම ගොඩ ගිය නිසාය.
(මෙය උපුටාගැනීමකි)
