09/10/2024
ඩුබායි සවාරියක්
Love Lake ... ❤️❤️❤️
එක් සති අන්තයක අපි "ආදර වැව" බලන්න ගියා, එක්සත් අරාබි එමීර් රාජ්යයේ ඩුබායිහි අල්කුද්රා ප්රදේශයෙ තමයි මේ ආදර වැව නැත්නම් " Love lake" පිහිටල තියෙන්නෙ. කාන්තාර බිම් පහුකරගෙන යන අතරමඟ අපට මුලින් ම හමුවුණේ Flemingo lake" නම් ලද දිය කඩිති සමහයකින් සැදුණු වැව. ඒ තැන් තැන්හි විවිධ වර්ගයේ පක්ෂීන් රංචු පිටින් හිටියෙ හරියට සංචාරකයන් ඇදගන්න එක එයාලගෙ රාජකාරිය කියලා හිතල වගේ. ඒ දර්ශනයෙන් වශී වෙලා නවතින්න හිතුණත් අපේ අරමුණ වුණේ ලව් ලේක් නිසා අපි දිගටම අපේ ගමන ගියා.
මෙන්න අන්තිමට අපි ඇවිත්...
හදවත් හැඩයට නැවූ අතුඉති සහිත ගස්, ලීවලින් සකසා තැන් තැන්හි එල්ලා ඇති හදවත් සහ හදවත් හැඩයේ ආරුක්කු අතරින් ලව් ලේක් නාමපුවරුව සහිත හදවත් හැඩයේ පිවිසුම් දොරටුවට අපි ආවා. ආදර වැවේ හැමතැනම ආදරේ හිතෙන එක එක විදියෙ හදවත් එක එක විදියෙන් පෙනී හිටියා.
හදවත් හැඩ කීපෙකිනුයි මේ ආදර වැව හදලා තිබුණෙ. අපේ රටේ වැව්වලට වගේ දිග ඉතිහාසයක්, පුරාවෘත්තයක් ඒ වැවට තිබුණෙ නෑ. අපේ වාරි පද්ධතිය ගොඩනැගිල තියෙන්නෙ කෘෂිකර්මාන්තය පදනම් කරගෙන. ඒත් මේ " Love Lake" වගේ ම
" Flemingo Lake " ත් සංචාරක කර්මාන්තය වෙනුවෙන් නිර්මාණය කර ඇති අතර, අපේ රටේ වගේ වැසිදියෙන් පිරෙන වැව් නොවෙයි.
ඒ ආශ්රිත වනයත් ස්වාභාවික වනයක් නෙවෙයි. පාලකයන් විසින් ඒවා ඉතා සැලසුම්සහගත ලෙසත් ආකර්ෂණීය ලෙසත් නිර්මාණය කර, පවත්වාගෙන යමින් තිබුණා.
නොගැඹුරු වැව මැද තැනින් තැන ඉදිකර තිබූ හදවත් හැඩ මතින් ආදර දිය බිඳු විසිරෙනවා. කෙනෙක් තැනක වූ හදවත් හැඩැති මල් ආරුක්කුවලින් යුත් බංකු මත ඉඳගෙන සැන්දෑ හිරු එළිය විඳින අතරෙ, නුග සෙවන යට, නිල් තණපළස මත වැතිරගත් යුවළක් පොත් කියවනවා. තවත් යුවළක් හදවත් හැඩැයෙන් අලංකාර කර ඇති ජායාරූප පසුබිමේ උනුන් වළඳගෙන ජායාරූපයක් ගන්නවා. ඒ අතරෙ තැනෙක එලූ කලාල මත හිඳගෙන කමින් බොමින් සතුටු සාමීචියේ යෙදෙන පිරිසක් දැකගන්නටත් පුළුවන්. වැවේ ඈත කොනක ඉඳලා නම නොදන්නා කුඩා කුරුලු රංචුවක් දිය මතුපිටින් වේගයෙන් පීනා එනවා. නිතර දැක පුරුදු සංචාරකයන් නොතකා තාරාවුන් වැව් ඉවුර වෙත අවුත් මඳක් විවේක ගන්නවා. ඉවුර අසබඩ ඉදි වූ ලෑලි වේදිකාව මතට වී දෙපස පීනන රන්වන් මසුන්ගේ සුරතල් විඳිනවුන්ගේ සිනාකතා හඬ පන්පඳුරු අතරින් ඇහෙනවා.
මේ අතර, තවත් බිම්කඩක, රාත්රිය ගෙවී, ඉර උදාවන පැයක අරුණලු දකින රිසියෙන් එහි කඳවුරු බඳින මිනිසුන් ....
වැවට එපිට තුරු අතරින් සැඟවයන්නට සැරසෙන සැඳෑ හිරුගේ දීප්තිය ආදර වැව දරන වාළුකාවේ ඉසිහින් වැලි තලය වසා පැතිරෙන ඒ හැන්දෑවේ අවසන් භාගයේ, මේ වාලුකා කතර මැද තුරුලතායෙන් හෙබි වනයක් මවා, ඒ මැද ආදර වැව තැනවූ රටේ පාලකයා සමහර විට තම රටේ පුරවැසියකු නිවීසැනසිල්ලේ පාර මාරුවන තුරු තම වාහනය නවතා ඉවසීමෙන් බලා ඉන්නවා ඇති.
මේ සුන්දර ඩුබායිහි සංචාරය කරන්න හොඳම කාලෙ තමයි ඔක්තෝම්බර් සිට අප්රේල් දක්වා කාලෙ.
ඔබත් එන්න, ඒ සංචාරයේ අත්දැකීම් විඳින්න.
(ජායාරූප අන්තර්ජාලයෙනි)
