11/06/2026
LU CUMENTU de Melpignanu (Le)
Lu Cumentu meu, quantu n'hai viste, de storie, de risate e de conquiste. Da quattru seculi stai ddhai, e ancora osci guardi lu crai.
Natu tra fede e devozione, oggi sì simbolu e tradizione. Tra le petre e le tue mure, ripòsane ricordi, sogni e paure.
Tra li monumenti cchiù belli e ammirati, da vicinu e de luntanu visitati, sì l'orgogliu de nu paese sanu, sì l'anima viva de Melpignanu.
Addhunca simu crisciuti chianu chianu, sutta l'umbra toa,
allu Cumentu de Melpignanu.
Addhunca li vagnoni sciòcane a pallone, cu la libertà stampata intra lu core.
Addhunca ogni petra, senza fare rumore, cunta na storia e regala calore; cunta nu picca de la storia mea, e, si te fermi ad ascoltare, puru de la toa.
D'estate la gente se setta e ragiona, mentre lu friscu de la sera l'accumpagna. Tra na risata, nu ricordu e na parola, ogni giurnu pare na festa ca consola.
D'invernu, invece, tra passi e silenzi, te fai cumpagnu de pensieri e sentimenti.
E poi arriva la musica, ca tutto incanta, e lu Cumentu diventa la Notte dellaTaranta.
Tamburelli, passi e note in libertà, portane Melpignanu nell'eternità.
Ma non vivi sulu de na notte all'annu, fannu le prove pe la commedia tuttu l'annu lu gruppu OLI'MMIA, tra risate e dialettu, teatru, trovane rifugiu perfettu e te fannu compagnia.
Perce' non sì sulu petra, non sì sulu architettura: sì memoria, appartenenza, orgogliu, anima e cultura.
Passane l'anni e le stagioni, cangiane li tiempi e le emozioni, ma iddhru sta ddhai, forte e maestuso, comu nu Sire saggio e generoso.
E finché ci sarà na vuce ca la storia tua la cunta, e na manu pronta a tramandare e raccontare...
perce' addhunca c'è lu passatu, lu presente e lu crai; e finché campa Melpignanu,
LU CUMENTU NUN MORE MAI.
Dedicata cu tuttu lu core
Na fijia de Melpignanu
MLuna Fiore
