12/06/2026
Franck, Schumann, Gunnar og Bach
13 júni, il. 15:15 í Fella- og Hólakirkju
Fiðlusónata César Franck var saminn sem brúðkaupsgjöf handa fiðluleikaranum Eugène Ysaÿe, árið 1886, og er eitt þekktasta verk sinnar tegundar, en hér heyrist það í útsetningu Jean-Pierre Rampal fyrir flautu og píanó. Verkið er úthugsuð listasmíð, þar sem stefin úr fyrsta kaflanum eru notuð sem efniviður í hinum köflum sónötunnar. Tónlistin er stórbrotin, með háum svífandi línum sem njóta sín vel á flautunni, ásamt ótal bitastæðum einleiksköflum fyrir píanóið.
Rómönsurnar þrjár fyrir óbó og píanó, Op. 94 eftir Robert Schumann, samdi hann sem jólagjöf handa eiginkonu sinni, Clöru, árið 1849. Þær eru vafalaust þekktasta kammerverk fyrir óbó frá þessum tíma, en tónlistin er tjáningarík, angurvær og íhugul, og fer tónblæ óbósins afar vel.
Spíra eftir Gunnar Haraldsson var frumflutt á WindWorks hátíðinni á Akureyri síðasta sumar, en heyrist hér í fyrsta skipti á höfuðborgarsvæðinu. Verkið er fyrir englahorn og altþverflautu og kannar hina dökku hljómblæi hljóðfæranna.
Tónleikunum lýkur með samspili allra hljóðfæranna í tríósónötu BWV 1039 eftir Johann Sebastian Bach. Sónatan er samin fyrir tvær þverflautur og basso continuo og þannig þá flutt á Café Zimmerman í Leipzig í kringum árið 1740, en tónlistin smellpassar inn í kaffihúsastemmingu 18. aldar og vel hægt að ímynda sér að einhver hafi tekið snúning á sónötunni á óbói, sem var algengt hljóðfæri á þeim tíma. Hér heyrist hún í útsetningu flytjenda fyrir flautu, óbó og píanó.
