05/02/2026
Kæru vinir, Hér er ræða mín frá framboðsfundi okkar Sjálfstæðismanna sem haldin var í Bæjarbíói á þriðjudaginn var! Fullur salur og mikill stuðningur við flokkinn okkar! Ég hlakka til baráttunnar fram að kosningum þar sem við sjálfstæðismenn verðum með frábæran lista!
Kæru Hafnfirðingar.
Kæru sjálfstæðismenn.
Það er gott að vera hér í kvöld og sjá sal fullan af fólki sem lætur sig Hafnarfjörð varða. Og eins og allt skynsamt fólk þá kjósum við Sjálfstæðisflokkinn. Í raun er hér rjómi þjóðarinnar, Hafnfirskir Sjálfstæðismenn.
Ég heiti Viktor Pétur Finnsson og ég er hafnfirðingur í húð og hár. uppalinn hér og með djúpar rætur bæði í Hafnarfirði og Sjálfstæðisflokknum. Afi minn, Árni Grétar Finnsson var hér oddviti á árum áður og hefur fjölskyldan mín verið virk í starfi flokksins í lengri tíma.
Ég býð mig fram vegna þess að ég trúi á bæinn okkar. Vegna þess að Hafnarfjörður er einstakur bær þar sem er frábært að alast upp, ala upp börn, eldast og verja ævinni.
Ég vil að Hafnarfjörður sé áfram, raunverulegur valkostur við önnur sveitafélög. Þar sem álögur á íbúa eru lágar, samgöngur góðar, leik og grunnskólar til fyrirmyndar, öflugt æskulíðsstarf, sterk velferð og að sveitafélagið auðveldi íbúum lífið.
Ég finn að undanfarið hefur ungt fólk leitað í Hafnarfjörð sökum þess hve illa hefur farið í Reykjavík í samgöngu, leikskóla og húsnæðismálum. Fjölskyldur koma hingað í leit að auðveldara og betra lífi og því er nauðsynlegt í kosningunum í vor að við höfum öflugan málsvara í okkar liði sem nær þessu unga fólki nær flokknum. Vel hefur gengið í meirihlutatíð Sjálfstæðisflokksins og við þurfum að halda áfram.
Hér hefur verið sýnt að hægt er að ná tökum á leikskólavandanum án þess að hækka gjöld. Hægt er að hafa blómlegan miðbæ með bílastæðum og að hægt er að framkvæma og reka bæinn vel án þess að hækka skatta.
Ég vil bæ sem stendur með atvinnulífinu.
Bæ sem leggur ekki stein í götu þeirra sem skapa störf, heldur ryður brautina.
Bæ sem er snyrtilegur, lifandi og stoltur af sjálfum sér.
Ég hef fengið tækifæri til að starfa víða – ég hef tekið sæti á Alþingi, unnið í banka, sem flugþjónn, sem umsjónarmaður hljómsveitar, sem leikstjóri, sem blaðamaður og margt fleira.
Mér hefur hlotnast sá heiður að fá að sinna formennsku margra félagasamtaka eins og SUS, Stefnis og Vöku. Ég er nú ungmennafulltrúi íslands hjá Sameinuðu Þjóðunum og sit í Háskólaráði HÍ. Ég þekki það að vera málsvari stórs hóps og að fá fólk til að vinna saman að sameiginlegu markmiði með sjálfstæðisstefnuna að leiðarljósi.
Kæru vinir.
Sjálfstæðisflokkurinn og Hafnarfjörður eru mér hvoru tveggja mjög kær og ég brenn fyrir bæinn minn.
Ég bið um ykkar stuðning í 2 sætið. Því ég vil að Hafnarfjörður sé ekki bara valkostur heldur fyrsti valkostur.
