11/07/2016
ਸਤਿਗੁਰ ਦੇਵੇ ਤਾਂ ਮਿਲੇ ਵਡਿਆਈ ਸਾਨੂੰ
ਮਿਹਰ ਹੋਵੇ ਤਾਂ ਉਦਮ ਵੀ ਕਰੇ ਬੰਦਾ।
ਵੱਡੀ ਰਕਮ ਹੈ ਖਰਚਣੀ ਬੜੀ ਅੌਖੀ
ਰਿਸਕ ਵੀ ਬਹੁਤ ਵੱਡਾ ਹੈ ਡਰੇ ਬੰਦਾ।
ਮੈਕਸੀਕੋ ਤਾਈਂ ਤਾਂ ਕਹਿੰਦੇ ਬਾਈ ਏਅਰ ਜਾਣਾ
ਇਤਬਾਰ ਏਜੰਟਾਂ ਦੇ ਕਹਿਣ ਤੇ ਕਰੇ ਬੰਦਾ।
ਥਾਂ ਥਾਂ ਵਿਕਣਾਂ ਤੇ ਪੈਦਲ ਵੀ ਜਾਣਾ ਪੈਂਦਾ
ਟਰੱਕਾਂ ਬੱਸਾਂ ਤੇ ਬਾਡਰ ਪਾਰ ਕਰੇ ਬੰਦਾ।
ਜੰਗਲ ਪਹਾੜ ਤੇ ਕਿਧਰੇ ਵੈਰਾਨ ਰਸਤਾ
ਸਮੁੰਦਰ ਕਿਸਤੀਆਂ ਵਿਚ ਪਾਰ ਕਰੇ ਬੰਦਾ।
ਕਿਤੇ ਹੋਟਲਾਂ ਵਿਚ ਤੇ ਕਿਤੇ ਜੇਲ ਕੱਟਣੀਂ
ਬਰੈਡ ਚਾਵਲਾਂ ਨਾਲ ਗੁਜਾਰਾ ਕਰੇ ਬੰਦਾ।
ਖਾਤਿਰ ਰੋਜ਼ੀ ਦੀ ਲੰਘਣੇ ਕੱਠਨ ਰਸਤੇ
ਜਿੰਦਗੀ ਮੌਤ ਦੀ ਲੜਾੲੀ ਲੜੇ ਬੰਦਾ।
ਅਾਖਿਰ ਮੈਕਸੀਕੋ ਦਾ ਬਾਡਰ ਪਾਰ ਕਰਕੇ
ਪੈਰ ਅਮਰੀਕਾ ਦੀ ਧਰਤੀ ਤੇ ਧਰੇ ਬੰਦਾ।
ਪਹੁੰਚਦੇ ਸਾਰ ਹੀ ਅੱਗੋਂ ਪੁਲੀਸ ਫੜਦੀ
ਵਕੀਲ ਵੀ ਜੇਲ ਵਿਚ ਜਾ ਕੇ ਕਰੇ ਬੰਦਾ।
ਤੀਹ ਲੱਖ ਲਾ ਅਮਰੀਕਾ ਚੇ ਪਹੁੰਚ ਕੀਤੀ
ਡਾਲਰਾਂ ਵਿੱਚ ਇਥੇ ਬੌਂਡ ਵੀ ਭਰੇ ਬੰਦਾ।
ਖੁਸ਼ੀ ਮਨਾਉਣ ਪਿਛਲੇ ਸ਼ੁਕਰ ਕਰਨ ਰੱਬ ਦਾ
ਅਮਰੀਕਾ ਪਹੁੰਚ ਕੇ ਫੋਨ ਜਾਂ ਕਰੇ ਬੰਦਾ।
ਕਾਰਜ ਸਭਨਾਂ ਦੇ ਸਤਿਗੁਰ ਕਰਨ ਵਾਲਾ
ਪੱਤੜ ਸਭ ਕੁੱਝ ਰਜਾ ਵਿੱਚ ਜਰੇ ਬੰਦਾ।।
Written By: Jagir Singh Pattar
