17/03/2025
「當我嚟到紐卡素嗰陣，
已經同大家講過我嘅目標，
就係希望名留球會史冊！
我哋之前係一支護級球隊，
結果去到歐聯，
到依家係聯賽盃冠軍。
今年係我擔任隊長嘅第一年，
我講多一次，
呢度就係我第二個家！」
時隔70年，
紐卡素終於再次封王英格蘭本土錦標，
隊長古馬雷斯同溫布萊嘅球迷一樣High爆，
受訪時更喜極而泣：
「球迷們值得擁有呢一切！
對好多球迷嚟講，
佢哋成世人都未見過紐卡素奪冠，
依家終於可以大聲講，
我哋再次成為冠軍！而且當之無愧！」
其實紐卡素喺呢70年唔係冇捧盃，
佢哋喺1969年攞過國際城市博覽會盃（相當於歐霸前身），
2006年稱霸圖圖盃，
不過對上一座本土冠軍，
已經係1955年足總盃。
至於利物浦領隊施洛接連失兩盃，
亦難掩失望：
「喺利物浦嘅歷史，
當然唔係第一次兩連敗，
呢啲係足球嘅一部份。
尤其對手係歐洲最出色球隊之一（巴黎聖日耳門），
而另一隊係英格蘭勁旅紐卡素。」
尋晚王者之戰，
絕對係優勝劣敗。
紐卡素表現出強大決心，
上半場射門9對1，
首度榮登國腳嘅丹般先開紀錄，
而利物浦唯一射門根本唔中框，
換邊後伊沙克整多粒，
基本上封王無乜懸念，
紅軍喺補時階段由基艾沙破蛋。
