07/09/2026
搬野上車搬野落車, 更新宿舍要搬啦
由當日因為一位街友食食下飯話想返轉頭, MANNA呢間餐廳仔就開展左更新宿舍, 去到上年開始有兄弟畢業, 開左大埔第二期宿舍生活事奉落去, 到今日, 連第一期宿舍都因為太多人而要搬, 感謝上主, 有一個大幾倍嘅地方準備左俾我地, 所以最後我地決定展開新一里路, 由一開始一個一對一小嘗試, 去到今日有好多過來人成為同工, 一同“回頭堅固弟兄”。 勇敢回應, 原來就可以經歷豐盛而滿有故事嘅生命。
其實去到今日, 都仲會有人問我地做咩要同班弟兄諗咁多, 覺得佢地抵死, 覺得佢地就係應該受返自己過去決定嘅惡果。我明白, 有時我地都會咁諗, 特別當佢地講大話, 當我地阿四, 玩分黨分派, 不斷當我地愛心係垃圾嘅時候, 我地都會諗為咩仲要自己搵苦黎辛。MANNA所有同工, 就算唔係更新事工上嘅, 都應該有諗過, 不如出去做M記, 返工放工攪好自己算。
如果睇住班弟兄嘅現況, 其實真係好難愛落去。而我地堅持同埋真心想同佢地行, 我估唯一原因就係, 我地都知道佢地嘅過去, 咩意思呢? 佢地好多個本身嘅故事, 其實你有機會聽完之後, 你都會惱唔落, 你都會明白原來佢宜家咁克人憎, 原來係有好多成因。所有係我地宿舍到住緊嘅弟兄, 內心其實都仲係有佢良善嘅一個火苗保留左係到, 通常都係因為佢地仍然渴望去信同愛, 而小火苗雖然俾一大堆絕望嘅黑暗包圍住, 但都正正因為咁, 當你定眼望落去, 係會顯得特別明亮。同工就係因為望到呢樣野, 而決定堅持落去。
MANNA其實可能只係一個令自己看見, 同時令人看見, 令人嘗試相信盼望嘅事工。
#唔好睇我地幫緊人
#其實我地都係想事奉中幫埋自己
#多謝大家支持我地等我地可以在地如在天
#黎緊開支越黎越大請大家支持我同不同事工
