22/03/2025
რატომ არის მტკივნეული ადამიანის გაშვება და რა აყალიბებს არაჯანსაღ მიჯაჭვულობას?
როგორ უნდა მოვახერხოთ მიჯაჭვულობისგან გათავისუფლება?
მიჯაჭვულობა არის ადამიანის გამოცდილების ფუნდამენტური ნაწილი. ჯერ კიდევ დაბადების მომენტიდან ჩვენ ვეძებთ კავშირს პირველ რიგში მშობლებთან, მოგვიანებით მეგობრებთან, პარტნიორებთან, კოლეგებთან და ა.შ. ეს კავშირი აყალიბებს ჩვენს ემოციებს, ქცევას და დაცულობის განცდას, ხოლო მისი დაკარგვა იწვევს ისეთ განცდებს, როგორიცაა ემოციური და ფიზიკური ტკივილი, დაკარგულობის და სიცარიელის განცდა და ა.შ.
რატომ არის მტკივნეული დაშორება ვინმესთან და მისი გაშვება?
1. ემოციური უსაფრთხოების დაკარგვა
ადამიანი, რომელსაც ვეჯაჭვებით, ხდება ჩვენი ემოციური მხარდაჭერის სისტემის ნაწილი და მისი დაკარგვა გავს სტაბილურობის დაკარგვას, რაც შეიძლება დაკავშირებული იყოს მიტოვების ან უარყოფის ღრმა შიშებთან;
2. დაუსრულებელი ემოციური საჭიროებები
ხშირად ურთიერთობები ირეკლავს ბავშვობის მოუგვარებელ ტრავმებს. თუ ბავშვობის ადრეულ წლებში ადამიანი ვერ იღებს საკმარის სიყვარულს და აღიარებას, ამ ყველაფრის ძებნას იწყებს რომანტიკულ ურთიერთობებში. როდესაც ადამიანი მიდის მისი ცხოვრებიდან, მას თითქოს ეხსნება წარსულის ჭრილობები, რაც ქმნის შეგრძნებას რომ ტკივილი, რომელსაც განიცდის ბევრად უფრო ღრმაა, ვიდრე იმ ადამიანის დაკარგვით გამოწვეული ემოცია;
3. ცვლილებების შიში
ადამიანები კომფორტულად გრძნობენ თავს ისეთ რაღაცეებთან, რაც მათთვის უკვე ნაცნობია. მაშინაც კი თუ ურთიერთობა არაჯანსაღი და ტოქსიკურია, ღირებულია მხოლოდ იმიტომ რომ ნაცნობია. მისი გაშვება კი უკვე ნიშნავს შეაბიჯო რაღაც ახალში, რაც ჯერ კიდევ უცხოა თქვენთვის და რაც გაშინებთ;
4. იდენტობების აღრევა
რომანტიკულ, განსაკუთრებით ხანგრძლივ ურთიერთობებში ხშირად ადამიანები ირგებენ მეორე ადამიანის იდენტობას. პარტნიორის არსებობა გავლენას ახდენს მათ ყოველდღიურ რუტინაზე, მიზნებზე, ჩვევებზე და იმაზე, თუ როგორ ხედავენ ისინი საკუთარ თავს. როდესაც პარტნიორი ტოვებს ადამიანს და მიდის, მიჯაჭვული ადამიანი გრძნობს, რომ თითქოს მისგან რაღაც მისი ნაწილი წავიდა ამ ადამიანთან ერთად;
5. დოპამინის დღიური დოზა
სიყვარული და მიჯაჭვულობა ქმნის ისეთ ქიმიურ რეაქციას ტვინში, რაც ძალიან ჰგავს დამოკიდებულებას. საყვარელი ადამიანის მოულოდნელი დაკარგვა იწვევს ისეთი ჰორმონების შემცირებას, როგორიცაა დოპამინი და ოქსიტოცინი, რაც იწვევს სევდის შეგრძნებას, შფოთვას და ფიზიკურ ტკივილს.
როგორ უნდა გავთავისუფლდეთ მიჯაჭვულობის ტკივილისგან?
1. გააცნობიერე ტკივილი
ემოციების დათრგუნვა მხოლოდ ახანგრძლივებს განკურნების პროცესს. მიეცი საკუთარ თავს გლოვის, ტირილის და დანაგარგის განცდის უფლება;
2. გააცნობიერე ტკივილის საფუძველი
კითხე საკუთარ თავს, ეს ტკივილი კონკრეტულ ადამიანს უკავშირდება თუ დაკავშირებულია ბევრად უფრო ღრმა ტრავმასთან (მაგ. ადრეულ ბავშვობაში უარყოფის ან მარტოობის შიში)? პირველადი მიზეზის გაგება დაგეხმარება უფრო ეფექტურად გაუმკლავდე ამ ტკივილს;
3. კონცენტრირდი საკუთარი თავის სიყვარულსა და პიროვნულ ზრდაზე
გარეგანი მიმღებლობისა და ვალიდაციის ძიების ნაცვლად, ენერგია მიმართე შენს შინაგან სამყაროზე. დაიწყე ისეთი აქტივობების კეთება, რაც სიამოვნებას განიჭებს, მიმართე თვითზრუნვას, განაახლე კავშირი საკუთარ მისწრაფებებთან;
4. შექმენი ახალი რუტინა
გაარღვიე ძველი ჩვევების ციკლი და შექმენი ახალი. შეცვალე შენი გარემო, გაიჩინე ახალი ჰობი, ან დაიწყე ყოველდღიური გაცნობიერებული პრაქტიკები (იოგა, მედიტაცია, mindfulness);
5. ეძებე მხარდაჭერა
მიმართე მეგობრებს, თერაპიას ან თვითდახმარების რესურსებს, იმისათვის, რომ გქონდეს ჯანსაღი მხარდამჭერი სისტემა. შენს ემოციებზე საუბარი დაგეხმარება ტკივილის შემცირებაში.
იმ ადამიანის გაშვება, რომლის მიმართაც გრძნობ ღრმა მიჯაჭვულობას, არის ადამიანის ერთ-ერთი ყველაზე რთული ემოციური გამოცდილება. მისგან გამოწვეული ტკივილი დაკავშირებულია ღრმა ემოციურ კავშირთან, მოუშუშებელ ჭრილობებთან. მიუხედავად იმისა, რომ რაღაც დროის მერე ტკივილი ნელდება და ადამიანი თითქოს იწყებს ახალ ცხოვრებას, მან შესაძლოა გაიმეოროს იგივე სცენარი და მიეჯაჭვოს სხვა ადამიანს და კვლავ განიცადოს იგივე ემოციები. ამიტომ საჭიროა ასეთ დროს ადამიანმა მიმართოს ფსიქოთერაპიას იმისათვის, რომ მოაგვაროს ადრეული ბავშვობის გამოცდილებებით გამოწვეული არაჯანსაღი პატერნები, გადაამუშავოს წარსულის მოუშუშებელი ჭრილობები, იპოვოს შინაგანი ღერძი და საყრდენი რომ შეძლოს ჯანსაღი ურთიერთობების დამყარება.
