27/08/2026
＜炸子雞＞有感：（長文慎入☠️）
估唔到大家咁喜歡淋雞條片😂係幾治癒既！
不過大家可能更關注係有冇得食！？
對於“即食。外賣。餸包”呢3個範疇既項目我地都有 涉獵
一直以來，我地都盡力研究將可以做成餸包既食物，前題係顧客要接受“即使經過n 次細微調節，都總有距離”，呢個係事實但係方便左遠距離同需要方便既朋友😊。
外賣，做到既我地都會做，不過拎到返去“凍左，焗過，要翻熱。。。”距離近可能好d，但太遠既距離同時間。一切都容易生變。
堂食，我地冇😂😂😂坦白講，當要去到維持一間舖既營運同生計，食物可唔可以純粹配合香港人口味就夠生存？望住近年明明好好食既舖都結業。。。唔好忘記，英國既亞洲食品代表可能係wagamama 😶🌫️
可能有人會閙,點解香港野食黎到舖食會唔同左？咁我地又諗下意大利人閙香港pizza點解有菠蘿？（sor !🤤 我最愛。。。）
所以，遇上有點要求既朋友，我會建議上門私廚，你想食乜？咩風味？幾點食？自己話事，即使家用廚房設備會打折扣，但係隨住熟悉同設備提升，你可以得到最貼近廚師真正質素既食物。呢個亦係我地會有固定上門客戶既原因。
而呢隻雞，暫時我地只會係接受私廚預訂，唔會勉強做餸包，或者可能試下調節，將來會唔會做到外賣再公佈。
最後想講既係，每個人對食既追求都唔同，有人覺得黎到有乜食乜，食pizza 已經好滿足，當食客追求極致既同時，我地都一直係異地之中努力尋找食材 ＆方法，解決地域既限制，希望將更好既帶到比鐘意食既人，所以好多謝由3年前一直包容我地成長既顧客🙇🏼♀️一直接受我地既不完美，比空間我地改進。
我地相信，口味好個人，每個世一係食客心中既標準都唔同，唔一定每個人都要喜歡我地既食物，所以唔需要比較唔需要介懷，緣份到了，就會食得到你喜歡既世一。
