22/08/2026
Queridos veciños, veciñas e amigos:
Cun sentimento de inmenso orgullo e gratitude, queremos dirixirnos a todos vós despois de vivir unhas festas da Agonía inesquecibles. O éxito acadado este ano é o resultado directo do esforzo colectivo, e non atopamos palabras suficientes para dar as grazas por todo o que conseguimos xuntos.
Queremos destacar de xeito moi especial:
• Aos nosos carroceiros: Polas súas espectaculares carrozas, que desbordaron unha calidade excepcional e mantiveron vivo e no máis alto o noso tradicional desfile. E que ademáis achegaron novas mans a realización destas carrozas con novas incorporacions.
Este mes de traballo previo a festa foi o verdadeiro motor desta unión.
• Aos actos relixiosos: Todo o relacionado coa igrexa estivo precioso. Grazas ao noso cura, aos maiordomos, e a todos os que fixeron posible unha novena emotiva, unha procesión fermosísima e ese momento tan especial da bendición do noso novo estandarte.
• Ao Concello de Tomiño: Pola súa total colaboración en todos os eventos celebrados ao longo do ano e polo seu firme apoio á nosa tradición.
• A toda a veciñanza de Amorín: Aos que colaboraron de calquera forma, ás casas que nos abriron de par en par as portas durante o percorrido coa treboada, e a cada persoa que sumou coa súa doazón e a súa alegre participación.
• A Lara e a todo o seu equipo: Grazas de corazón pola gravación do documental "A voz das mans". É un proxecto fermoso que logrou unir aínda máis a todos os carroceiros. Estamos todos desexando con moita ilusión poder ver o resultado final. Grazas, Lara!
O noso traballo foi intenso e esgotador, pero ver os froitos e o que se viviu nestas festas é a mellor recompensa posible.
Porén, a alegría non puido ser completa. Queremos compartir publicamente o noso fondo pesar polo falecemento do noso veciño Manuel Álvarez “Coruto” o mesmo día da festa. Coincidir co momento álxido de todos os actos impediu que puideramos despedilo e acompañar á súa familia como realmente merecía. Se nese difícil momento fallamos nalgún aspecto, pedimos as nosas máis sinceras desculpas á súa familia e achegados, aos que enviamos todo o noso agarimo.
Grazas a todos por facer grande a Amorín e por manter acesa a chama das nosas tradicións. Viva a festa da Agonía!
