18/09/2019
شوفت صور فرح احمد فهمى وهنا الزاهد...من ضمنهم صورة للأنترو بتاع الفرح وهما ورا ستاير وظلهم بس اللى باين وشغل خيالى من بتاع افلام ديزنى....طبعا الصورة دى قلبت عليا المواجع مش عايز اقولكو ازاى...افتكرت بقى الانترو بتاع فرحى.
الموضوع ابتدى لما الراجل مسئول القاعة قالى وانا بحجز متجبش بقى "ويدنج بلانر"...عشان احنا عندنا هنا حسن...منظم حفلات عالمى...خبرة 15 سنة فى المجال دا...فقولتله حاضر مع انى كدا كدا مكنتش هجيب...انا مكنتش عاوز اعمل فرح اصلا يعنى.
المهم يوم الفرح اول ما نزلت انا ومراتى من العربية لقيت واحد بيقرب منى وبيقولى أنا هنا جنبك...اوعى تقلق...هبقى معاك خطوة بخطوة عشان نخرج بالفرح بأحسن شكل.
وبعدين دخلنا جوه اوضة قبل ما ندخل القاعة وقالنا عايزين نعمل انترو كريتيف مش تقليدى....انت هتقف انت والعروسة ورا ستارة وهتحط ايد ورا رقبة العروسة والايد التانية ماسك ايد العروسة بالعكس فى نفس الوقت العروسة ايديها ورا كتفك وايديها التانية عاملة كدا وهتبدلوا مكان الدبل....وخلانا نعمل الحركة العجيبة دى كـ بروفة...قولتله بس احنا شكلنا عبيط كدا اوى يا استاذ...احنا مش هعمل كدا.
قالى انت مش فاهم...اصل انتو مش هتبانو كدا...انتو هتقفوا ورا الستارة والظل بتاعكو هو بس اللى هيبان فهيطلع شكل جميل....قولتله اكيد يعنى الظل اللى هيبان مش احنا؟....قالى:اه طبعا دى بتطلع شكل جميل اوى خصوصا فى الفيديو.
وخلانا عملنا اللى قاله دا من ورا الستارة....وخلصنا ودخلنا الكوشة و لسة بقعد لمحت صورتى انا ومراتى عـالشاشة من غير ظل واحنا عاملين زى الحيوانات اللى بتطلع فالافلام الوثائقية بالحركة اللى هو قالهالنا!!!....اه والله العظيم كانت صورة منتهى الهطل!...انا خايف اوريهالكو والله لتتحول لكوميك على الفيسبوك😂.
المهم احاول اشاورله يا ابن ال**** شيل الصورة...لا حياة لمن تنادى....شيلها انا ليا اعدائى هتفضح...طب شيلها شوية عشان أعرف اشرب العصير بس وحطها تانى...مفيش فايدة فضل مثبت الصورة يجى ربع ساعة عــالشاشة!
شوية ولقيته جاى يقولى احطلكوا صواريخ فالتورتة؟....قولتله صواريخ ايه!...قالى صواريخ بتدى شكل جميل للتورتة...قولتله الله يحرق اشكالك الجميلة...هو فيه ايه!....قالى والله بتبقى حلوة فى الفيديو...قولتله طب حط ماشى عشان أخلص من زنه...راح ابن ال**** جاب بـ 500 جنيه صواريخ وخصمهم من المبلغ بتاع تأمين القاعة اللى مفروض اخده بعد الفرح....وفى الاخر آلاقى الصواريخ دى عبارة عن حاجة بنت **** ملهاش اى شكل!
وطول الفرح بقى قرف من النوع دا.....يشاورلى من بعيد افك زرار البدلة...مرة تانية يشاورلى اقفل البدلة...مرة تالتة يقولى أشاور للمعازيم زى جمال عبد الناصر...دا غير ان مراتى طلبت منه يشغل اغنية من الفلاشة بتاعتها عشان لما نرقص سلو...راح مشغل حاجة تانية خالص...سألته بعدها ليه ؟ قالى معجبتنيش فشغلت حاجة احلى...اللى هو تحس ان الفرح بتاعه هو واحنا مجرد اسباب يعنى.
وكل دا كوم بقى وانه بعت الراجل بتاع التنورة خلاه وهو بيلف بالبتاعة قرب منى وقالى الاستاذ حسن بيقولك بوس قورتها عشان الفيديو بيصور!
يا أخى ام الفيديو
على ام التنورة
على ام الفرح
منقول😂😂😂😂😂
