Shoqata Sharri Switzerland

11/06/2026

Urime 12 Qershori – Dita e Çlirimit të Kosovës

Sot kujtojmë me krenari dhe respekt një nga ditët më të rëndësishme të historisë sonë kombëtare. Më 12 Qershor 1999, pas shumë sakrificash, dhimbjesh e humbjesh, Kosova nisi rrugën e saj drejt lirisë.

Me përulësi nderojmë dëshmorët, martirët, veteranët e Ushtrisë Çlirimtare të Kosovës dhe të gjithë ata që sakrifikuan gjithçka për atdheun. Kujtojmë gjithashtu mbështetjen vendimtare të NATO-s dhe miqve ndërkombëtarë, të cilët qëndruan në anën e drejtësisë dhe lirisë.

Nga rrënojat e luftës lindi shpresa. Nga sakrifica u ndërtua liria. Nga dhimbja u ngrit një shtet që sot ecën përpara me dinjitet, krenari dhe vizion për të ardhmen.

Le të jenë lulet simbol i kujtimit për ata që ranë, ndërsa prosperiteti, zhvillimi dhe uniteti të jenë amaneti ynë për brezat që vijnë.

Lavdi e përjetshme dëshmorëve të kombit!
Mirënjohje për UÇK-në dhe të gjithë çlirimtarët!
Nderim për aleatët tanë të NATO-s!
Urime 12 Qershori – Dita e Çlirimit të Kosovës!

🇦🇱🇽🇰

Shoqata Kulturore Shqiptare “Sharri” – Zvicër
Duke ruajtur kujtesën, duke kultivuar kulturën dhe duke forcuar dashurinë për atdheun.

10/06/2026

📨 Telegram Urimi

I nderuari mik, Vigan Berisha,

Me rastin e ngritjes së Misionit Konsullor të Republikës së Kosovës në Cyrih në nivelin e Konsullatës së Përgjithshme, Shoqata Kulturore Shqiptare “Sharri” ju përcjell urimet më të sinqerta dhe më vëllazërore.

Ky është një moment i rëndësishëm historik për shtetin tonë dhe për mërgatën shqiptare në Zvicër. Ky avancim dëshmon forcimin e vazhdueshëm të pozitës së Republikës së Kosovës në arenën ndërkombëtare dhe vlerësimin e rolit të jashtëzakonshëm që mërgata jonë ka dhënë ndër vite.

Vlerësojmë lart angazhimin, përkushtimin dhe punën tuaj të palodhshme në shërbim të qytetarëve tanë dhe në forcimin e urave të bashkëpunimit ndërmjet Kosovës dhe Zvicrës. Jemi të bindur se Konsullata e Përgjithshme në Cyrih do të jetë një adresë edhe më e fuqishme në shërbim të bashkatdhetarëve tanë.

Në emër të Kryesisë dhe anëtarësisë së Shoqatës Kulturore Shqiptare “Sharri”, ju urojmë suksese të mëtejshme në misionin tuaj fisnik.

Urime dhe përgëzime për këtë arritje të rëndësishme!

Me respekt,

Shoqata Kulturore Shqiptare “Sharri”
Waldkirch – St. Gallen 🇽🇰🇨🇭

Veton Sermaxhaj
Kryetar

09/06/2026

🇦🇱🇽🇰 Festa e Nacioneve (Nationenfest) në Romanshorn po afrohet!

Shoqata “Sharri” tashmë është në vlugun e përgatitjeve intensive, si për programin në skenë ashtu edhe për stendat tona, ku këtë vit do të prezantohemi me dy stenda: atë të Shqipërisë dhe të Kosovës.

Si gjithmonë, edhe këtë vit do të japim maksimumin në çdo aspekt, me qëllimin e vetëm që kulturën, traditat, vlerat dhe specialitetet tona t’i prezantojmë në mënyrën më dinjitoze para publikut vendas dhe ndërkombëtar.

Prandaj, mos hezitoni! Ejani edhe ju dhe bëhuni pjesë e këtij manifestimi të madh kulturor. Kontributi juaj, qoftë edhe vetëm me praninë tuaj dhe një duartrokitje për valltarët tanë, ka vlerë të jashtëzakonshme. Për ne dhe sidomos për fëmijët tanë, ajo është motivim, mbështetje dhe forcë për të vazhduar punën me edhe më shumë përkushtim.

Le të tregojmë së bashku kulturën, traditën dhe mikpritjen shqiptare!

Mirë u pafshim të shtunën, më 13.06.2026, në Romanshorn!

Me respekt,
Shoqata “Sharri

01/06/2026

Te Faliminderit shum Dashnim Hebibi!

Sot kishim kënaqësinë dhe nderin e veçantë që, në kuadër të ciklit tonë “Një pasdite me…”, të mirëprisnim Shkëlqesinë e Tij, z. Mentor Latifi, Ambasador i

31/05/2026

Ambasadori Mentor Latifi në Shoqatën “Sharri”

Sot kishim kënaqësinë dhe nderin e veçantë që, në kuadër të ciklit tonë “Një pasdite me…”, të mirëprisnim Shkëlqesinë e Tij, z. Mentor Latifi, Ambasador i Republikës së Kosovës në Bern.

Ambasadori Latifi u prit në mënyrë tradicionale shqiptare, me bukë, kripë e zemër, për të vazhduar më pas me prezantimin e lokaleve dhe veprimtarisë së Shoqatës “Sharri”.

Ashtu siç ishte paraparë, në ora 14:00 filloi programi sipas planit. Tubimin e hapi koreografi i Shoqatës sonë, Kreshnik Sadikaj, i cili pasi përshëndeti Ambasadorin dhe të gjithë të pranishmit, ftoi anëtarin e Kryesisë, Islam Sadiki, për një fjalë rasti.

Në fjalën e tij, Islami theksoi se Shoqata “Sharri” ka filluar një traditë të re përmes ciklit “Një pasdite me…”, duke sjellë pranë komunitetit personalitete të shquara të jetës kombëtare dhe diasporike. Ai foli për rëndësinë e ruajtjes së identitetit, gjuhës, kulturës dhe traditave shqiptare në diasporë, si dhe prezantoi aktivitetet dhe sukseset e Shoqatës ndër vite.

Me krenari u theksua se Shoqata “Sharri”, e themeluar në vitin 2008, numëron mbi 180 anëtarë dhe mbi 85 valltarë të ndarë në tri grupe, duke zhvilluar aktivitete të shumta kulturore, artistike dhe kombëtare gjatë gjithë vitit.

Pas fjalës së nikoqirit, fjalën e mori Ambasadori Mentor Latifi, i cili falënderoi përzemërsisht Shoqatën “Sharri” për pritjen madhështore dhe respektin e treguar.

Një falënderim të veçantë ia kushtoi Islam Sadikit për ftesën dhe Kryetarit Veton Sermaxhaj për mikpritjen e ngrohtë.

Në fjalimin e tij, Ambasadori tha se anëtarët e Shoqatës “Sharri” janë ambasadorët më të mirë të Republikës së Kosovës, sepse puna, angazhimi dhe përkushtimi i tyre e bëjnë Kosovën krenare kudo që ndodhen.

Ai vlerësoi veçanërisht numrin e madh të familjeve dhe fëmijëve që ndjekin vallëzimin tradicional shqiptar, duke theksuar se është frymëzuese të shohësh të rinj të lindur e të rritur në Zvicër, të cilët me dëshirë dhe krenari vazhdojnë rrugën e prindërve të tyre në ruajtjen e kulturës dhe traditës shqiptare.

“Zemra më bëhet mal kur shoh një lokal të tillë, të mbushur me fotografi, histori, traditë dhe dashuri për atdheun. Kjo dëshmon se diaspora jonë nuk e ka harruar rrënjën dhe identitetin e saj”, u shpreh ndër të tjera Ambasadori Latifi.

Programi vazhdoi me valle të përgatitura nga grupet e Shoqatës “Sharri”, të cilat u duartrokitën ngrohtësisht nga të pranishmit. Në shenjë respekti dhe mirënjohjeje për vizitën dhe mbështetjen e tij ndaj komunitetit shqiptar në Zvicër, Shoqata “Sharri” i ndau Ambasadorit Mentor Latifi një Mirënjohje të veçantë.

Takimi përfundoi në atmosferë të ngrohtë vëllazërore pranë Sofrës së Sharrit, ku të pranishmit patën mundësinë të bashkëbisedonin lirshëm me Ambasadorin.

Shoqata “Sharri” e falënderon nga zemra Ambasadorin Mentor Latifi për kohën, përkushtimin dhe respektin që tregoi ndaj komunitetit tonë dhe i uron suksese të mëtejshme në misionin e tij diplomatik.

Mirë se vini gjithmonë në familjen e madhe të Shoqatës “Sharri”!

29/05/2026

Një mbrëmje e veçantë letrare, artistike dhe historike në Shoqatën “Sharri”

Të nderuar miq të Shoqatës “Sharri”,

Sonte, në lokalet e Shoqatës sonë, patëm kënaqësinë dhe nderin të jemi nikoqirë të promovimit të romanit “Revolta e Syzifit” të autorit të mirënjohur Bardhyl Mahmuti, si dhe të mirëpresim personazhin kryesor të këtij romani historiko-letrar, Fadil Muqolli.

Tubimi u hap me shfaqjen e një filmi dokumentar të realizuar enkas për Familjen Muqolli dhe Masakrën e Poklekut, një dëshmi e dhimbshme e krimeve që përjetoi populli ynë gjatë luftës në Kosovë.

Në emër të Kryesisë së Shoqatës “Sharri”, të pranishmit i përshëndeti Islam Sadiki, i cili falënderoi organizatorët për besimin dhe përzgjedhjen e Shoqatës sonë si vend promovimi. Ai theksoi se Shoqata “Sharri” mbetet gjithmonë e hapur për shkrimtarë, poetë, artistë dhe krijues të cilët dëshirojnë të prezantojnë veprat dhe arritjet e tyre para komunitetit tonë.

Në rolin e moderatorit, Isuf Sherifi përshëndeti të pranishmit dhe vlerësoi bashkëpunimin e frytshëm ndërmjet organizatorëve dhe Shoqatës “Sharri”, duke krijuar një atmosferë të ngrohtë dhe miqësore.

Për rëndësinë e veprës dhe vlerat e këtij botimi foli Adnan Asllani, i cili analizoi mesazhin dhe peshën historike që përcjell romani.

Autori Bardhyl Mahmuti, gjatë fjalës së tij, elaboroi mbi përmbajtjen e librit, tragjeditë dhe masakrat që përjetoi Kosova, duke bërë thirrje që kujtesa historike të ruhet dhe të kultivohet brez pas brezi. Ai theksoi se harresa është rreziku më i madh, sepse një histori e harruar rrezikon të përsëritet.

Një nga momentet më prekëse të mbrëmjes ishte fjala e Fadil Muqollit, protagonistit kryesor të romanit. Rrëfimi i tij për Masakrën e Poklekut dhe fatin tragjik të familjes së tij emocionoi thellë të pranishmit. Fjalët e tij të sinqerta dhe të dhimbshme prekën zemrat e të gjithëve, duke sjellë para syve të secilit realitetin e hidhur të asaj kohe.

Atmosferën artistike e pasuroi poetja Shqipe Bytyqi, e cila lexoi fragmente të përzgjedhura nga libri, duke i dhënë mbrëmjes një dimension të veçantë letrar dhe emocional.

Pas prezantimeve u zhvillua një bashkëbisedim i hapur me autorin dhe protagonistin, ku të pranishmit patën mundësinë të parashtrojnë pyetje dhe të ndajnë mendimet e tyre mbi librin dhe temat që ai trajton.

Mbrëmja u përmbyll në frymën e kulturës, artit dhe kujtesës historike, me biseda të afërta mes pjesëmarrësve, autorit dhe mysafirëve të nderit.

Sonte, edhe një herë, Shoqata “Sharri” dëshmoi se është jo vetëm një vatër e traditës sonë kombëtare, por edhe një shtëpi e kulturës, artit, librit dhe historisë sonë kombëtare.
Po ashtu Autori i nenshkroj qdo liber te blere dhe beri Foto me secilin ne shenj respekti.

Faleminderit të gjithë pjesëmarrësve që me praninë e tyre e bënë këtë mbrëmje kaq të veçantë. Në Shoqatën “Sharri”, libri, kultura dhe kujtesa kombëtare do të kenë gjithmonë derën e hapur. 🇦🇱📚✨

28/05/2026

Të nderuar anëtarë të Kryesisë,
Të nderuar anëtarë të Shoqatës “Sharri”,

Nesër mbrëma, e premte më 29.05.2026, në lokalin e Shoqatës sonë, kemi nderin dhe kënaqësinë të jemi nikoqirë të promovimit të librit „Revolta e Syzifit“ të autorit të mirënjohur Bardhyl Mahmuti.

Ky promovim nuk është vetëm një aktivitet kulturor, por edhe një dëshmi se Shoqata “Sharri” mbetet vatër e dijes, kulturës dhe respektit për fjalën e shkruar shqipe. Prandaj, ju bëjmë thirrje që të marrim pjesë sa më masovikisht, për të treguar mikpritjen, kulturën dhe respektin që dimë t’ua ofrojmë mysafirëve tanë.

Prania e secilit prej jush i jep vlerë këtij organizimi dhe e bën edhe më madhështore këtë mbrëmje kulturore.

Andaj, mos hezitoni — ejani nesër nga ora 19:00 dhe të kalojmë së bashku një mbrëmje të veçantë në frymën e kulturës, respektit dhe bashkimit.

Mirë se vini!

28/05/2026

Sot, me shumë respekt e dashuri, Shoqata Kulturore Shqiptare “Sharri” i uron Ditëlindjen njërit prej figurave më të çmuara të kulturës dhe fjalës shqiptare, Rexhep Rifatit – Bacës Rexhë.

Bacë Rexha, me urtësinë, përkushtimin dhe dashurinë ndaj kombit e kulturës sonë, ka lënë gjurmë të pashlyeshme në zemrat tona. Fjala juaj gjithmonë ka bashkuar njerëz, ka ruajtur traditën dhe ka frymëzuar breza të tërë shqiptarësh, kudo që jetojnë.

Në këtë ditë të veçantë, ju urojmë shëndet të plotë, jetë të gjatë, lumturi familjare dhe shumë momente të bukura pranë më të dashurve tuaj.
Faleminderit për kontributin, për zemrën e madhe dhe për gjithçka që keni bërë për kulturën dhe kombin shqiptar.

Gëzuar Ditëlindjen Bacë Rexhë!
Me respekt dhe mirënjohje të thellë,
Shoqata Kulturore Shqiptare “Sharri”

27/05/2026

Me rastin e Festës së madhe të Kurban Bajramit, Shoqata Kulturore Sharri ju uron nga zemra të gjithë anëtarëve, simpatizantëve dhe miqve, të cillet festojnë:

Urime Kurban Bajrami!

Kjo festë e shenjtë sjelltë paqe, begati, shëndet dhe harmoni në familjet tuaja.
Le të mbizotërojë dashuria, respekti dhe humanizmi mes nesh, duke e forcuar edhe më shumë lidhjen tonë si komunitet.

Në këto ditë feste, kujtojmë vlerat më të larta të sakrificës, solidaritetit dhe mirësisë, duke shtrirë dorën e afërsisë për njëri-tjetrin.

Gëzuar Kurban Bajramin!
Me respekt dhe urimet më të sinqerta,
Shoqata Kulturore Sharri