dr Glaibasler

25/01/2026

04/12/2025

D’ Vorwiehnachtszyt die isch jetz doo
ych bi do drüber wirgglig nit immer froh
in de Läde wird dr Stess so langsam groos
au in dr Stadt do isch ainiges scho loos
me isch nervös und gstresst no schnäll
und bruucht no Gschänggli hösch jä gäll
au in dr Clique isch d Freud jetz wägg
my Sujet und s Goschtüm isch e drägg
e Marsch muess ych no lehre hösch in Rueh
doch ych bi fuul und ha jetz anders z’due
my Drooscht do drüber bin ych wirgglig froh
will vylne goot’s doch in däre Zyt jo au esoo
drumm erinneret euch doch als guete Root
um was es aigentlig an dr Wiehnacht goot

24/10/2025

Hüt in zwai Monet ganz genau
fyyr ych Hailigobe mit dr Frau
s erschte Couvert jä das isch so
han ych per Boscht au scho beko
das Gschängg es isch gewaltig
e Rächnig vo dr Stüürverwaltig

07/10/2025

Es Herbschtelet und s’isch au kalt
Mäss und Wiehnacht sin scho bald
jo aigentlig isch das e schöni Zyt
will d Fasnacht isch jo au nüm wyt
s’Schlimme für mi ych due’s do klaage
wenn d Lääde spinne muess ych saage
d’Angscht isch bi ainige scho grooss
drumm goot’s bi vyyle jetz scho loos
mit dr Wiehnacht dien sy jetz scho starte
jä sie könne wirglig nümme lenger warte
so kasch Santigläus und au Grätimaa
au Gliewyy jetz scho bald im Lade ha
ych wär drfür das würd au sicher laufe
me könnt jetz scho Faschtewaie kaufe
my Vorfreud uf d’Fasnacht isch scho do
hösch die könnt vo mir us au scho ko
so freu my denn wenn’s haisst mit Gnuss
mit däre Wiehnacht isch jetz schluss

22/07/2025

So Ferie das isch aifach wundervoll
nie me schaffe das wär doch sicher toll
doch laider het das au en Änd scho glyy
und die schöni Zyt isch so schnäll verbyy
ych rais nit wyt jä das muesch gseh
für Ferie zmache gang ych ins Eglisee
au s’nögscht Joor goot`s bi mir nit wyt
ych blyb z’Basel und mach e schöni Zyt
im Summer gniess ych myni Haimat-Stadt
dert isch’s halt scheen und au sauglatt
für mi isch das doch aifach wirgglig prima
so schon ych s’Portemonnaie und s’Klima

20/05/2025

Hösch dr ESC dä isch in Basel au verbyy
jetz goots nach Öschtrych das muess syy
die freue sich, mir wünsche au vyyl Spass
d’Latte die liggt hoch jä das isch krass
goots dört wirgglig no ums singe main ych
jä isch s’Gwünne doch nit völlig glych
hesch e Botschaft und wotsch au klage
jä so gang an ESC und dues dört sage
trotz allem mir hets gfalle duen ych praale
au wenn mir einiges hänn miesse zahle
s’isch friidlig bliibe jä das ischs s’Bescht
Basel het das guet gmacht e tolls Fescht

14/04/2025

D Oschtere kunnt, bald isch’s so wyt
ych blyb dehai und gniess die Zyt
z Basel uf dr Gass do hesch kai Rueh
denn unseri Baize hän nit alli zue
ych mach e Wälle, das wird glatt
mit myne guete Fründe in dr Stadt
e Reis das duen ych mir jetz spare
und sicher nit ins Tessin au fahre
um Basel kasch tolli Usflüg mache
und au kulinarisch git’s gueti Sache
Sparse ässe oder vom Grill e Wurscht
au z’Dringge gits gnueg für dy Durscht
jä dr Rhy und unsri schöni Lange Erle
sin doch z’Basel wunderscheeni Perle
ych gang gärn wägg doch freu my immer so
wenn ych wider ka nach Basel Haime ko

04/04/2025

Jä ych wurd im Trump gärn schryybe
ob är wirglig no vier Joor will blyybe
dä macht e Zoll uf dausigi vo Sache
das könntsch in Basel au so mache
stell dr vor uf s’Bier jä jede Schlugg
und wenn de willsch au über d’Brugg
uf jedes Räppli sait dr Zoll denn Dangg
und jede Väärs vom Schnitzelbangg
jä dä Ami Presidänt isch sone Gloon
do bin ych froh, dass ych in Basel wohn

24/03/2025

Jä d Fasnacht die isch so schnäll verbyy
dr letschti Bummelsunntig isch scho glyy
au e Resumé wird scho langsam gmacht
ha Freud ka und mit em Publikum au glacht
ha durch d Gasse drummlet mit vyyl Stolz
jä mit myner neue Drummle ganz us Holz
für e tolli Fasnacht saag ych allne Dangg
als Drummler und au als Schnitzelbangg
für Toleranz Respäggt und Humor stand ych yy
hösch so sötts au nach dr Fasnacht immer syy

18/02/2025

D Spannig styggt jetz goots denn schnäll
jä au d’Dääg die wärde wider lenger häll
d Närve mache mi hösch ganz verruggt
jä will d’Fasnacht immer nöcher ruggt
vyli in dr Clique sin nervös und graizt
die wo schaffe wärde schnäll verhaizt
es bruucht nit so vyyl und s’glöpft au moll
in dr Lange mergsch das au es isch nit toll
entschpann dy und due mol greftig lache
mir wänn numme zämme Fasnacht mache

22/12/2024

An dr Wiehnacht lauft immer Sissi überal
uf jedem Sänder s’Glyche es isch brutal
au kasch s Aschenbrödel vyylmols gseh
so vyyli widerholige das duet doch weh
statt dr glaini Lord jä ych wär wirgglig froh
wenn s’Drummeli au wurd im Färnseh ko
und statt oh du fröhlige wie immer singe
könnte d Ohregribler au mol öbbis bringe
bi mir kunnt am Hailigobe s’isch e Pracht
jä statt s’Chrischtkindli d’Frau Fasnacht
und nach em guete Ässe s’isch bi uns e so
duet au maischtens s’Fasnacht-Thema ko
so isch dä Obe immer das isch s’Gröscht
hösch au ohni Sissi e ganz tolls Fescht

06/11/2024

In Amerika do hänn sy gwählt s’duet weh
Jä dr Trump wird Presidänt hesch gseh
es isch verruggt dä isch doch gar nit gsund
hösch d Wält die zitteret, jetz goot’s rund
uf d Fasnacht freu my, dient alles saage
und vorallem göhnt dr Obrikait an Kraage
Sujet muess nit immer luschtig sy hejo
au für das isch sicher unsri Fasnacht do
drumm nämme mir kai Blatt vors Muul
mir saage was mer dängge das isch cool