24/09/2026
Ölkəmizdə hər bir sahənin inkişafı ilə bağlı konkret Dövlət Proqramları qəbul edilir və uğurla icra olunur. Prezident İlham Əliyevin rəhbərliyi ilə qəbul edilmiş hər bir Dövlət Proqramı iqtisadiyyatımızın inkişafına və ölkə vətəndaşlarının rifahının yüksəldilməsinə xidmət edir. “Azərbaycan Respublikasında 2027-2030-cu illərdə dağ-mədən (metal filizləri) və metallurgiya sənayesinin inkişafına dair Dövlət Proqramı” da bu baxımdan mühüm əhəmiyyət daşıyır.
Sentyabrın 22-də Azərbaycan Respublikasının Prezidenti cənab İlham Əliyevin sədrliyi ilə “Azərbaycan Respublikasında 2027-2030-cu illərdə dağ-mədən (metal filizləri) və metallurgiya sənayesinin inkişafına dair Dövlət Proqramı”na həsr olunmuş müşavirə keçirilib. Müşavirədə çıxış edən prezident İlham Əliyev ölkə iqtisadiyyatı üçün, xüsusilə ölkəmizin qeyri-neft sektorunun inkişafı üçün böyük əhəmiyyət daşıyan dağ-mədən və metallurgiya sənayesinin inkişafı ilə ölkəmizdə yeni, müasir sənaye istiqaməti yaradılacını qeyd edib. Dövlət Proqramının 2027-2030-cu illərdə tam icra edilməsininin qarşıya mühüm vəzifə kimi qoyulduğunu vurğulayan dövlətimizin başçısı yeni proqramın, eyni zamanda, regionların sosial-iqtisadi inkişafına dair gündəliyimizi əks etdirdiyini diqqətə çatdırıb.
Prezident İlham Əliyev Azərbaycanda dağ-mədən sənayesinin həm obyektiv, həm də subyektiv səbəblərə görə lazımi səviyyədə inkişaf etmədiyini, işğal dövründə Kəlbəcər, Laçın və Zəngilan rayonlarında 60 min hektar meşə fondunun Ermənistan dövləti tərəfindən məhv edildiyini, hazırda bir çox perspektivli yataqlarımızın hələ də öz geoloji kəşfiyyat dövrünü gözlədiyini qeyd edib. Bu məsələlərin həlli üçün Dövlət Proqramı əsasında çox konkret mexanizmlərin tətbiq ediləcəyini, ilk növbədə, işğaldan azad edilmiş ərazilərdə istismarda olan yataqların tezliklə işə salınacağını bildirib.
Perspektivli bölgə kimi Naxçıvan Muxtar Respublikasını da vurğulayan dövlətimizin başçısı bildirib ki, “Orada da vaxtilə, - sovet dövrünü nəzərdə tuturam, - və son dövrlərdə geoloji kəşfiyyat işləri lazımi səviyyədə aparılmamışdır. Ona görə orada da böyük yataqların mövcudluğu ehtimalı çox yüksəkdir. Naxçıvan Muxtar Respublikasında geoloji kəşfiyyat işləri artıq yəqin ki, gələn ildən başlayacaq.”
Növbəti istiqamətin Avropa qitəsində ən perspektivli yataqlardan biri sayılan Balakən rayonunda yerləşən “Filizçay” polimetal yatağı olduğunu xatırladan prezident artıq bir neçə ildir “AzerGold” şirkətinin bu yatağın istismara hazırlanması ilə bağlı işlər gördüyünü vurğulayaraq bildirib ki, “tezliklə texniki-iqtisadi əsaslandırma hazır olmalıdır və yekun investisiya qərarı da qəbul edilməlidir. Mən hesab edirəm ki, “AzerGold” bu yatağın 100 faiz səhmdarı olmalıdır. İstismar getdikcə təbii ki, bu yatağın qiyməti də, dəyəri də qalxacaq. Onda biz baxa bilərik. Ola bilər, müəyyən faiz səviyyəsində, - əgər maraq olarsa, mən əminəm ki, olacaq, - xarici investorlar da bu yatağa cəlb oluna bilər.”
Ölkə Prezidenti bu yaxınlarda yaradılmış Qərb Sənaye Parkının əsas məqsədinin məhz dağ-mədən sənayesinin inkişafı ilə bağlı olduğunu qeyd edib. “Daşkəsən” filiz yatağının istismarı və ona yaxın olan bölgələrdə digər layihələrin icra edilməsi, əlbəttə ki, məhz Qərb Sənaye Parkının yaradılmasını şərtləndirdi. Dövlət başçısının sözlərinə görə, burada, ilk növbədə, tezliklə infrastruktur yaradılmalıdır və bu məqsədlə büdcədə lazımi vəsait nəzərdə tutulmalıdır.
Prezident İlham Əliyev çıxışında təbiətin qorunmasına xüsusi diqqət yetirib: “Maksimum ekoloji ekspertiza aparılmalıdır və bütün ekoloji normalar gözlənilməlidir. Çünki əsas sərvətimiz hətta yerin altında olan sərvətlər deyil, bizim təbiətimizdir. Ona görə həm təbiətin qorunmasını, həm ekoloji normaların ən yüksək standartlara cavab verməsini, əlbəttə ki, biz xarici tərəfdaşlardan tələb edirik və tələb edəcəyik. Əgər ona əməl etməsələr, onlar cəzalandırılacaq. Təbii ki, dövlət şirkəti olan “AzerGold” bütün ekoloji standartlara cavab verməlidir.”
Bəli, dağ-mədən və metallurgiya sənayesinin inkişafından gözləntilər yalnız yeni iş yerləri və istehsal müəssisələri ilə məhdudlaşmır. İxrac potensialının genişlənməsi, dövlət büdcəsinə vergi daxilolmalarının artması və ölkəyə əlavə valyuta gəlirlərinin daxil olması iqtisadi nəticələrin əsas istiqamətlərini təşkil edir. Prezident İlham Əliyev gözlənilən illik müsbət maliyyə təsirinin bir milyard manatdan çox ola biləcəyini bildirərək layihələrin miqyasına diqqət çəkib.
Prezident İlham Əliyev müşavirədə ölkədə metallurgiya sənayesinin, o cümlədən alüminium istehsalının inkişaf etdirilməsi ilə bağlı tapşırıq və tövsiyələrini verərək bu önəmli sənaye istiqamətinin inkişaf etdirilməsinin vacibliyini diqqətə çatdırıb. Dövlət Proqramının maliyyə təminatının bütün müvafiq qurumlarla razılaşdırıldığını bildirən dövlətimizin başçısı onun icrasında yerli və xarici investorların da iştirakı üçün lazımi şəraitin yaradılacağını vurğulayıb.
2027–2030-cu illəri əhatə edən Dövlət Proqramı qeyri-neft sektorunun inkişafında əhəmiyyətli rol oynayacaq.
Zaqatala RİH Başçının müavini,
Sosial-iqtisadi və memarlıq-tikinti məsələləri
şöbəsinin müdiri
