25/07/2026
Գնում ենք «Արագած» ճամբար...
«Թեքեյան Կենտրոն» հիմնադրամը կրկին իրականացնում է «Ամառային ճամբար» ծրագիրը՝ այս անգամ ընդգրկելով Արցախից բռնի տեղահանված երեխաների: Ծրագրի շահառուները՝ «Արցախի արվեստագործների միություն» ՀԿ թվով 32 սաներն ու մանկավարժները, որոնք Ստեփանակերտից, Մարտակերտից, Հադրութից են, իրենց յոթնօրյա ամառային հանգիստը կանցկացնեն Մեղրաձորի «Արագած» ճամբարում:
«Թեքեյան Կենտրոն» հիմնադրամի «Ամառային ճամբար» ամենամյա ծրագիրը, որն իրականացվում է 2010թ-ից եւ սակայն դադար էր առել կորոնավիրուսի համավարակի եւ 44-օրյա պատերազմի պատճառով, հնարավորություն է ընձեռում երեխաներին իրենց ամառային հանգիստն անցկացնել մեր Հայրենիքի գեղատեսիլ վայրերում, դառնալու ինքնուրույն եւ ինքնավստահ:
Ծրագիրը նաեւ մեծապես նպաստում է մեր երկրի տարբեր անկյուններում բնակվող երեխաների մերձեցմանը, նրանց բազմակողմանի զարգացմանը՝ մտավոր, հոգեւոր, մշակութային գիտակցության, ֆիզիկական:
Առայսօր «Ճամբար» ծրագրի բյուջեն կազմել է ավելի քան 34 մլն ՀՀ դրամ եւ ընդգրկել է շուրջ 720 շահառու Հայաստանից եւ Արցախից՝ մասնավորապես 10-14 տարեկան գերազանց առաջադիմություն ունեցող, սոցիալապես անապահով եւ բազմազավակ ընտանիքների երեխաներ, որոնք ծրագրի շնորհիվ ձեռք են բերել նոր հմտություններ, գիտելիքներ եւ նոր ընկերներ:
Տարատեսակ մտավոր եւ ժամանցային խաղերի, մարզական, մշակութային միջոցառումների, ազգային երգ ու պարի ուսուցման, հիշարժան վայրերի այցելության շնորհիվ երեխաների ամառային հանգիստը դառնում է առավել բովանդակալի ու հետաքրքիր: Ճամբարը զարգացնում է անհատականությունը, պարգեւում անմոռանալի պահեր:
