10/06/2026
Sot 148 vjetori i themelimit të Lidhjes Shqiptare të Prizrenit. Bregu i Detit dhe krejt Labëria kishte përfaqësuesit e vet në këtë akt themelonjës. Piluri pati një burrë të çmuar e me peshë të madhe historike, Zerbin Çakallin.
Poeti i madh piluriot Lefter Çipa, në vitin 1981, në librin e vet “ Shqipëri moj ballëhapur” i kushton këtë baladë:
Zerbin Çakalli
Nga Lefter Çipa
Anës lumit kali i bardhë,
Linte trokun vetëtimë.
Pa sixhadera, pa shalë,
Tund vendin me hingëllimë.
Tërë Jugun kishte marrë,
Gjirokastër dhe Delvinë.
Kush e njih Zerbin Çakallë,,
Të zeshkët e kish japinë.
Burrë i rëndë e fjalëpakë.
Ortak me mandilezinë*.
Kur flit, sikur prit me pallë,
Përmbi kalë e kish selinë,
Shokë shumë, e kapedanë,
Bën tërtipe mbi Turqinë.
Tërë ç’qenë pashallarë,
Duajnë t’i digjnin shtëpinë.
Ku nuk i ish parë shtati,
Kudo zëri i dëgjuar.
Prizren e Janinë vajti,
Flit, pa letra e pa shkruar.
Tërë natën udhëtonte,
Me hënë e pa hënë vetëm.
Halli e puna e donte,
Të vij, të gjente Gjolekën.
Do takon Hodo Alinë,
Nesturin* në Breg të Detit,
Për punët e Shqipërisë,
Kish borxh të shterponte detin.
Thoshnë qeskën e duhanit,
E kish prej lëkurë ujku.
Uror, vetë jatagani,
Një pashë, i thantë, çibuku.
Ish i vërfër në të varfër,
S’kish pasuri e flori.
Se rrugën që kishte nisur,
S’punonte dot për shtëpi.
Po prapë oxhak i thoshnë,
Oxhak-lart, përmbi oxhaqe.
Ku mblidheshin dhe vendosnë,
Burrat trima me dyfeqe.
Sofrën shtruar bukë e kripë,
Miqtë përmbi gurë vatrës.
Miqtë e parë Frashërllinjtë,
Zjarr e zemër, tërë natës.
Në xhepat e xhamadanit,
Abetaren futur e mbante,
Dy trasta hedhur kalit,
Plot me libra shqipëtare.
Ku shkelte gjurma e kalit,
Shkelej një ferman Turqie,
Jeta e Zerbin Çakallit,
Degë lisi, Shqipërie.
Dhe një ditë mbylli sytë,
Zjarri i vatrës mbeti ndezur,
Gjithë krahinat edhe miqtë,
Ligjërojnë, me lot derdhur.
Telegramet venë e vijnë,
Shkruar me gërma shqipe.
Nga Abdyli në Janinë,
Vijnë ca pishtarë pishe.
Ndezur i mbajnë në duar,
S’i shuante dot tufani-
Kush për vendin ka punuar,
Pishën ndezur ka tek varri.
*Zenel Gjoleka dhe Odise Nesturi- Kasneci, luftëtarë të Rilindjes Kombëtare
Nga libri “Shqipëri moj ballëhapur”
Shtëpia Botuese “Naim Frashëri”
Tiranë 1981
