01/08/2025
Фармын амьдрал хүүхдүүдэд юу өгдөг вэ?
🍀Эрүүл хөдөлгөөн, агаар. Фарм дээр хүүхдүүд гэрт бүгнэ гэсэн ойлголт үгүй. Гадаа түмэн байгалийн үзэгдэл, амьтад гайхашруулах тул гэрт утас бариад суух нь уйтгартай. Ядаж л хүлэмжүүдийн наагуур цаагуур нуугдаж тоглоно. Тэгэх замаараа лууван болц нь гүйцсэнийг хараад нэгийг зулгааж шороог нь арчаад ам руугаа хийчихнэ. Бас эрвээхий хөөцөлдөж, гүзээлзгэний бут уралдаж шалгах гэх мэтээр ядрах завгүй өдрийг өнгөрөөнө.
🍀Эрүүл ходоод. Орчин цагийн хэт боловсруулсан, ариун хүнсний хэрэглээнээс үүдэж хүний гэдсэнд байх ашигтай бактери устаж, түүнээс үүдсэн төрөл бүрийн өвчинг эмнэх гэж бид "гадаад бактери" худалдаж авч уудаг. Харин фармын эрүүл хөрсөнд хичнээн тэрбумаар тоологдох ашигт бактериуд байх бөгөөд хөрстэй ажиллах, түүнд ургасан ногоог идэх явцдаа өөрийн биедээ ашигт бактериудыг үнэгүй нийлүүлдэг. Ийнхүү эрүүл микрофлора дүүрэн ходоодтой хүн аливаа өвчин эмгэгийн эсрэг бүрэн дархлаатай болдог билээ.
🍀Хамтдаа бүтээх боломж. Хүүхдүүд жижиг гэхгүй ажилд оролцоно. Тухайлбал, та бүхэнд очдог ууттай ногооны шошгыг хэн нэгбүрчлэн наадаг гэж бодож байна? ☺
🍀 Бие, сэтгэлийн хат. Гэр бүлээрээ байгалийн хатуу ширүүнийг сөрөн хөдөлмөрлөж, түүнийхээ үр шимийг хүртдэг учрыг эрт ойлгодог. Болохгүй, бүтэхгүйг тоочин сууснаас бага багаар ч хамаагүй өмнөх ажлаа нугалах нь үр дүнтэй гэдгийг мэднэ. Бага насанд нь суусан ийм хат тэдний амьдралынх нь туршид хамт байж хазайхад нь түшиж, хэлтийхэд нь босгож явах нягуур өндөр.
🍀 Хэрсүү зан. Аливаа зүйлс ид шидийн мэт бэлэн байдаггүйг ойлгодог болно. Дэлгүүрийн лангуун дээр байх нэг луувангийн ард хэдэн хүний гар, хэдэн зуун процесс оролцсоныг сканнердсан юм шиг харна. Тиймээс ч аливаа зүйлсийг хөнгөн хуумгай ойлгож, дутуу дулимаг шийдвэр гаргахгүй байхад суралцдаг.
🍀 Энэрэх сэтгэл. Ургамал, амьтан, шавж хорхойтой өдөр тутамдаа тааралдаж, тэд хэрхэн биесээ нөхөн дэмжиж, экосистемийн тэнцвэрээ ханган оршдогийг ойлгодог. Хүн ч ялгаагүй тэдний нэг нь. Хамаг амьтан амгалан байвал хүн бид ч амгалан оршихыг хэнээр ч заалгахгүй мэддэг.
🍀 Санхүүгийн тооцоотой, юмхнаар юм болгоход суралцдаг. Фармерууд халгиж, цалгисан мөнгөтэй байх нь ховор. Орж ирж буй төгрөг бүрийн ард асар их хөдөлмөр шингэсэн байдаг тул мөнгөнд тэр чинээгээрээ хямгатай ханддаг нь хүүхдүүдэд ч халдварласан байдаг.
🍀 Эцэг эхчүүд хүүхдүүдтэйгээ хамтдаа аж төрж, өөрийн биеэр үлгэрлэн хүмүүжүүлэх боломжтой байдаг. Мянга хэлэхээр нэг үз гэдэг. Өглөөнөөс орой хүртэл хамт ажиллаж, амрахдаа ажил бизнесээ ухаалгаар удирдан гүйцэтгэх арга, зөв амрах, зөв хоол ундаар бие сэтгэлээ тэтгэх гээд хүний амьдралын амин чухал ур чадваруудыг үлгэрлэн үзүүлж, оюун ухаанд нь гүн батаар суулгаж байдаг.
#органикмонголногоо, #органикфарм, #органикамьдрал, #органикамьдралынхэвмаяг, #гэргарденорганик
