24/07/2026
Ho an'ny Androm-pisaonam-pirenena
Ry havana malala, ry Malagasy iray tanindrazana,
Anio isika dia tsy mihaona amin'ny hafaliana, fa mihaona ao anatin'ny fanginana sy ny alahelo. Mavesatra ny fo satria misy fianakaviana namoy ny olon-tiany, misy ray aman-dreny very zanaka, misy zanaka very ray aman-dreny, ary misy nofy maro rava tao anatin'ny indray mipi-maso.
Ny ranomaso anio dia tsy an'ny fianakaviana iray ihany, fa ranomasom-pirenena. Rehefa misy Malagasy iray mijaly, dia tokony hiara-mijaly aminy isika rehetra. Rehefa misy aina iray very noho ny herisetra sy ny tsy rariny, dia maratra miaraka aminy ny fon'i Madagasikara.
Koa amin'izao Androm-pisaonam-pirenena izao, aoka isika hangina vetivety, tsy noho ny tsy fahitana teny holazaina, fa satria indraindray ny fanginana no teny lalina indrindra maneho ny alahelo.
Mivavaka isika mba hampionona ireo fianakaviana rehetra tra-pahoriana. Mivavaka koa isika mba tsy hiverina intsony ny herisetra sy ny habibiana, fa mba hanjaka eto amin'ny tanintsika ny fihavanana, ny rariny ary ny fandriampahalemana.
Ho an'ireo efa nandao antsika, mandria am-piadanana. Ho an'ireo mbola velona, enga anie izao alahelo izao hampiray antsika bebe kokoa fa tsy hampisaraka antsika.
Madagasikara iray ihany isika. Ny ratran'ny iray dia ratran'ny rehetra.
Mankasitraka antsika rehetra.🤝
