23/05/2026
දිවයින 2026-05-17
යුධ බිය මැද ඊශ්රායලයේ සූර්ය මංගල්යයක්!
කොහෝ හඬක් හෝ එරබදු මලක පැහැය හෝ නොවිඳින මුත් ඊශ්රායල් දේශයේ රැකියාවේ යෙදෙන ලාංකික හදවත් වලට අප්රේල් මාසය ඉතා සුවිශේෂය.සිංහල අලුත් අවුරුද්ද පිළිබඳ මතකයන් සමඟ ඔවුන්ගේ හදවතේ මැවෙන්නේ මව්බිමේ සිටියදී තම පවුල සමග ,ගම්බිම්වල අවුරුදු උත්සව වල දී ,ඒ ගෙවූ සුන්දර කාලයයි. සාත්තු සේවය, කෘෂිකාර්මික, ඉදිකිරීම් අංශය , වෙළෙඳ ආයතන සහ හෝටල් ක්ෂේත්රයේ රැකියාවන් කරන තිස් දහසක් පමණ ශ්රී ලාංකිකයන් ඊශ්රායලයේ රැකියාවේ යෙදෙයි. යුද්ධයක් ඇති රටක රැකියාවක් කිරීම ලෙහෙසි පහසු කටයුත්තක් නොවේ.
2026 පෙබරවාරි 28 දින ඇමරිකාව, ඉරානය, ඊශ්රායලය රටවල් අතර නැවත යුධමය තත්ත්වයක් ආරම්භ විය. මේ වන විටත් අපේ හෙලයේ මහා සංස්කෘතික මංගල්යය වන සිංහල අලුත් අවුරුද්ද සැමරීමේ උත්සව කිහිපයක් තෙල් අවිව් , ජෙරුසලම, ඇස්ඩොඩ් ,හයිෆා වැනි ප්රධාන නගරවල සංවිධානය වෙමින් පැවතුණි.යුද බිය වැඩි කරමින් ඉරානයෙන් ඊශ්රායලයට දිගින් දිගටම පහරදීම හේතුවෙන් එම උත්සව එකින් එක නවතා දැමීම සිදුවූ අතර පාසල් ,කාර්යාල, ගමනාගමන සියල්ල අඩපන විය. සිවිල් ජනතාවට එක් රැස්වීම් සියල්ල තහනම් විය.
එහෙත් 2026 අප්රේල් 9 වන දින ඇමරිකාව ඉරානය සමඟ සටන් විරාමයකට සාකච්ඡා පැවැත්වූ අතර ,කෙටි කාලීන සටන් විරාමයක් සඳහා සියලු පාර්ශව එකඟ වූ බව ප්රකාශ විය. ඒ ලද අවසරයෙන් දින දහයක් වැනි වූ කෙටි කාලයක් ඇතුළත ඊශ්රායලයේ හයිෆාහි වෙසෙන ශ්රී ලාංකිකයන්ගේ එකමුතු සංවිධානය වන "" හයිෆා අපි "" සංවිධානය එකට අත්වැල් බැඳගත් අතර ඔවුන් ඔවුන්ගේ කෙටි විවේක කාලය හා හාම්පුතුන්ගේ අවසර මත තම ධනය හා කාලය කැප කරමින් හයිෆා සූර්ය මංගල්යය පැවැත්වීමට ලහි ලහියේ සූදානම් විය. පළමුව ඔවුන් ඊශ්රායල් සහ ලාංකික අනුග්රාහක භවතුන් හමුවූ අතර ඔවුන්ගේ ගේ නොමද සහාය පැකිලීමකින් තොරව සුහදශීලීව ලබා ගැනීමට වාසනාවන්ත විය. එහිදී ප්රධාන අනුග්රහය වශයෙන් "ලිලීගා හෝල්ඩින්ස්" ආයතනය හා" Lanka Connect" යන ආයතන සුවිශේෂී විය.උත්සව කටයුතු සඳහා ඉඩ පහසුකම් සහිත කදිම ස්ථානයක්ද ලැබුණු අතර ද 2026 මැයි මස 9 වන දින එම ස්ථානයට මව්බිමේ සුවඳ ගෙන ,ඊශ්රායලයේ අලුත් අවුරුදු උදාව ද ගෙන රන් හිරු පායන්නට විය.
කැවුම් ,කිරිබත් ,කොකිස් කැවිලි වලින් අවුරුදු කෑම මේසය පිරී තිබුණි.ඔන්චිල්ලාවක්,රබානක් සමග පිළිගැනීමේ තොරණේ සිට සියලු ස්ථාන මව්බිමේ සුවඳ දැනෙන ලෙස නිර්මාණය කර අලංකාර කර තිබුණි. අඩි 16 උසට නිමකර තිබූ රන් හිරු සිත්තම එම උත්සව ස්ථානයේ නෙත් සිත් මන බඳිමින් මුළු උත්සවයම එළිය කර තිබුණි. ආරාධිත අමුත්තන් පැමිණ පොල්තෙල් පහන දල්වන ස්ථානයේ ආරච්චි, මැණිකේ සමඟ තල් අත්තක් ඔසවා ගත් අතවැසියාද මොහොතකට සියලු දෙනාම ගමට ගෙන ගියේය.අපේම රටේ ඇඳුම් ආයිත්තම් වලින් සැරසුණු සියලු දෙනාගේ මුහුණුවල සතුට පිරී තිබුණි.දහවල් ආහාරයද අපහසුවකින් තොරව ගැනීමට සැලසුම් සහගතව තිබූ අතර වෙළඳ ආයතනද ලාංකිකයන්ගේ පහසුව වෙනුවෙන් සැකසී තිබුණි. 2026ඊශ්රායල් අවුරුදු කුමරු ,කුමරිය ඇතුලු කනා මුට්ටිය බිඳීම ,බනිස් කෑම, කොට්ටපොරය ,අලියට ඇස තැබීම වැනි ජන ක්රීඩා රැසක්ම පැවැත්වූ අතර එම ජන ක්රීඩා ලාංකික හදවත් වලට මව්බිමේ සුවඳ සමඟ සතුට එකතු කර තිබූ බව එම මුහුණු වලින් අපට පෙනී ගියේය .තරග අවසානයේ ජයග්රාහකින්ට ඉතා වටිනා ත්යාග පිරිනැමුණි.
යුද්ධයෙන් පරිපීඩිත වූ හදවත් වලට රැකියාවේ ඒකාකාරිත්වයෙන් මිදී ලාංකික හදවත් සැනසීමේ අරමුණින් එදින සන්ධ්යාවත් සංගීත සංදර්ශනයකින් කල එළිවිය. සියලු දෙනාම සතුටු වූ බව ඔවුන්ගේ රැඟුම් අපට කියා පෑවේය.
දහසක් බාධක මැද නිදි වර්ජිතව අවම සම්පත් ප්රමාණයක් යොදා ගනිමින් "හයිෆා අපි" සංවිධානය අභියෝගවලට අභියෝග ගෙන එමින් හයිෆා සූර්ය මංගල්යය මව්බිමේ උත්සවයක් හා සමානවම කිරීමට සමත් වූ දක්ෂ කණ්ඩායමක් බව මෙහි සිටින ශ්රී ලාංකිකයන්ට නොරහසකි. එය සියලු ඊශ්රායල් හී ශ්රී ලාංකික හදවත් වල සොඳුරු මතක පොතේ විචිත්ර සිත්තමක්ව සිත්තම් කිරීමට" හයිෆා අපි සංවිධානය "සමත් වූ බවත් කිව යුතුමය.
මංගල කරඳවල ඊශ්රායල සිට
